EAEO-nyń básekege qabilettiligin arttyrý ózekti – Qasym-Jomart Toqaev
ASTANA.KAZINFORM — EAEO-nyń álemdik syn-qaterlerge tótep beretin áleýetin kúsheıtý kerek. Bul týraly búgin elordadaǵy Joǵary Eýrazııalyq ekonomıkalyq keńestiń otyrysynda Memleket basshysy Qasym-Jomart Toqaev málim etti.
Prezıdent bul kúnderi Astanada Joǵary Eýrazııalyq ekonomıkalyq keńestiń otyrysymen qatar, Eýrazııalyq ekonomıkalyq forým da ótip jatqanyn eske saldy. Osy oraıda forýmnyń qorytyndysy san qyrly iskerlik seriktestikke tyń serpin beretinine senim artty.
- Eýrazııalyq ekonomıkalyq odaq makroekonomıkalyq damýdyń oń dınamıkasyn saqtap otyr. Boljamǵa saı, 2026-2027 jyldary EAEO elderiniń jıyntyq ishki jalpy ónim ósimi 2,5 paıyzǵa jýyqtaýǵa tıis, - dedi Qasym-Jomart Toqaev.
Sonymen qatar Prezıdent jahandyq naryqtaǵy turaqsyzdyqqa qaramastan, byltyr EAEO elderi arasyndaǵy taýar aınalymy 95 mlrd dollardan asqanyn aıtty.
Memleket basshysy halyqaralyq uıymdardyń jahandyq naryqtaǵy jaǵdaıǵa bergen baǵasy kóńil kónshitpeıtinin jetkizdi. Halyqaralyq valıýta qorynyń baıandamasyna sáıkes, bıyl álem ekonomıkasy 3 paıyzǵa deıin baıaýlaıtyny jóninde aıtylyp júr.
Osy oraıda Qasym-Jomart Toqaev dúnıejúzindegi qurylymdyq ózgerister EAEO-nyń ekonomıkalyq damýyna da áser etpeı qoımaıtynyn atap ótti. Qazirgi sátte EAEO-ny jańa jaǵdaılarǵa beıimdeý, ishki ornyqtylyqty nyǵaıtý jáne básekege qabilettilikti arttyrý óte ózekti mindet bolyp tur.
Budan buryn habarlanǵandaı, Astanada Joǵary Eýrazııalyq ekonomıkalyq keńestiń otyrysy bastaldy.
