EAEO-nyń aýmaǵynan áketiletin taýarlardyń shyǵarylǵan jerin aıqyndaý tetigi naqtylandy
ASTANA. KAZINFORM — Búgin Parlament Májilisiniń jalpy otyrysynda «Eýrazııalyq ekonomıkalyq odaqtyń kedendik aýmaǵynan áketiletin taýarlardyń shyǵarylǵan jerin aıqyndaýdyń úılestirilgen júıesi týraly kelisimdi ratıfıkatsııalaý týraly» Zańyn qabyldady.
Zań jobasy Máskeýde 2023 jylǵy 4 jeltoqsanda jasalǵan Eýrazııalyq ekonomıkalyq odaqtyń kedendik aýmaǵynan áketiletin taýarlardyń shyǵarylǵan jerin aıqyndaýdyń úılestirilgen júıesi týraly kelisimdi ratıfıkatsııalaýǵa baǵyttalǵan.
— Kelisim taýarlardy Eýrazııalyq ekonomıkalyq odaqtyń kedendik aýmaǵynan áketý kezinde olardyń shyǵarylǵan jerin aıqyndaý, kýálandyrý jáne rastaý tásilderine quqyqtyq negizdi qamtamasyz etedi. Osy qujat EAEO-ǵa múshe memleketterdiń aýmaǵynan taýarlardy, onyń ishinde Qazaqstan aýmaǵynan shyǵarylatyn taýarlardy áketýge tyıym salýlar men shekteýler belgilengen zattardy shyǵarý kezinde tarıftik jáne tarıftik emes retteý sharalarynyń qoldanylýyn baqylaý úshin tıisti múmkindik beredi, — dedi QR Saýda jáne ıntegratsııa vıtse-mınıstri Aıdar Ábildabekov.
Onyń aıtýynsha, kelisimde Eýrazııalyq ekonomıkalyq komıssııa belgileıtin arnaıy qaǵıdatqa sáıkes, EAEO-nyń kedendik aýmaǵynan áketiletin taýarlardyń shyǵarylǵan jerin aıqyndaý eskerilgen.
Qujat aıasynda EAEO-ǵa múshe memleketter, onyń ishinde Qazaqstan belgilengen tarıftik emes retteýdiń birjaqty sharalardyń saqtalýyn baqylaýdy qamtamasyz etedi.
