EAEO-nyń áleýetin nyǵaıtýdyń strategııalyq mańyzdy mindeti tur – Qazaqstan Prezıdenti
ASTANA. KAZINFORM – Eýrazııalyq ekonomıkalyq odaq - jahandyq ekonomıkanyń mańyzdy sýbektisi. Bul týraly elordada V Eýrazııalyq ekonomıkalyq forýmnyń plenarlyq otyrysynda Memleket basshysy Qasym-Jomart Toqaev málim etti.
Qazaqstan Prezıdenti osy asa mańyzdy sharaǵa qatysqany úshin memleket basshylaryna, EAEO-ǵa múshe memleketterdiń ókilderine, baıqaýshy elderdiń kóshbasshylaryna jáne barlyq qonaqtarǵa shynaıy rızashylyǵyn bildirdi.
Sonymen qatar Memleket basshysy Eýrazııalyq ekonomıkalyq forým eýrazııalyq ıntegratsııany damytýdyń ózekti máseleleri boıynsha kásibı ári nátıjeli dıalogtyń tıimdi platformasy retinde keńinen tanylǵanyn jetkizdi.
Qasym-Jomart Toqaevtyń atap ótýinshe, Eýrazııalyq ekonomıkalyq odaq óńirlik ıntegratsııalyq birlestik qana emes, sonymen qatar jahandyq ekonomıkanyń mańyzdy sýbektisi. Buryn-sońdy bolmaǵan geosaıası dúrbeleńder kezinde EAEO elderi úılesimdi is-qımyl arqyly óz ekonomıkalarynyń ornyqty damýyn, álemdik naryqtaǵy básekege qabilettiligin qamtamasyz ete aldy.
- Qazir aldymyzda Eýrazııalyq ekonomıkalyq odaǵynyń áleýetin odan ári arttyryp, qarqyndy damytý jóninde strategııalyq mańyzdy mindeti tur, - dedi Prezıdent.
Memleket basshysynyń paıymynsha, dúnıejúzilik sharýashylyq baılanystarynyń baǵdary jappaı ózgerip jatqan kezeńde EAEO elderi teris sıpattaǵy jahandyq úrdisterge tótep berý úshin kúsh-jigerin jumyldyrýy kerek. Álemdik naryqtaǵy ahýal kúrdeli.
Budan buryn habarlanǵandaı, búgin elordada Memleket basshysy Qasym-Jomart Toqaevtyń qatysýymen V Eýrazııalyq ekonomıkalyq forýmnyń (EEF-2026) plenarlyq otyrysy bastaldy.
