EAEO naryǵynda daqyldardyń tuqymy boıynsha ımportqa táýeldilik bar — Goar Barsegıan
ALMATY. KAZINFORM — Almatyda EAEO Agroónerkásiptik saıasat jónindegi keńesiniń 7-shi otyrysy ótip jatyr.
Jıynda Eýrazııalyq ekonomıkalyq komıssııanyń Ónerkásip jáne agroónerkásiptik keshen jónindegi mınıstri Goar Barsegıan EAEO elderinde aýyl sharýashylyǵy daqyldary tuqymynyń jekelegen túrleri boıynsha ımportqa táýeldilikti tómendetý úshin memleketter arasyndaǵy yntymaqtastyqty kúsheıtý qajet ekenin atap ótti. Onyń aıtýynsha, tuqym sharýashylyǵy áli de ımportqa joǵary táýeldilik saqtalyp otyrǵan eń mańyzdy baǵyttardyń biri.
Sonymen qatar odaqqa múshe memleketter bir-biriniń naryǵyn tolyqtyryp otyrǵany atap ótildi. Surypty tuqymdardy ózara jetkizý kólemi artqan. Eger úshinshi elderden tuqym ımporty 1,5 esege azaısa, odaq ishindegi ózara tuqym saýdasy 1,6 ese ósip, shamamen 80 mıllıon AQSh dollaryna jetken. EAEO ishinde Reseı naryqqa negizinen bıdaı tuqymyn, Qazaqstan — kúnbaǵys tuqymyn, al Armenııa — júgeri tuqymyn jetkizedi.
Biraq Goar Barsegıannyń aıtýynsha, keıbir daqyldar boıynsha ımportqa táýeldilik áli de joǵary deńgeıde. Ásirese qant qyzylshasynyń tuqymyna qajettilik bar.
— Jalpy alǵanda bizde ımportqa táýeldilik áli de joǵary, ásirese qant qyzylshasy boıynsha aıqyn baıqalady. Árıne, ár eldiń óz múmkindikteri bar. Soǵan baılanysty qazir yntymaqtastyq sheńberinde qant qyzylshasy boıynsha kooperatsııalyq jobany qarastyryp jatyrmyz. Bul joba osy baǵyttaǵy ımportqa táýeldilikti azaıtý úshin sharalardy kúsheıtýge múmkindik beredi. Birinshi kezekte ishki qajettilikterdi ózimizdiń óndiris esebinen qamtamasyz etý úshin kooperatsııa aıasyndaǵy sharalardy birizdendirý jumystaryn odan ári jalǵastyramyz, — dedi ol.
Goar Barsegıan tuqym aınalymy salasyndaǵy talaptardy birizdendirý baǵytynda da jumys istelip jatqanyn aıtty. Onyń ishinde ózara tanylatyn tuqym sapasy týraly qujattardyń biryńǵaı reestri daıyndalyp jatyr.
— Odaq sheńberinde úlken jumys júrgizýimiz kerek, eń aldymen sharalardy birizdendirý, sonymen birge kooperatsııany damytý aıasynda tıisti qadamdar jasaý qajet, — dedi mınıstr.
Odan bólek komıssııa odaqqa múshe memlekettermen birlesip, sorttarynda gendik-ınjenerlik materıal bar ósimdik tuqymdarynyń aınalymy týraly zańnamaǵa taldaý júrgizedi. Qazir jemis-jıdek daqyldary men júzimniń sapasyn anyqtaý ádisteri de ázirlenip jatyr.
Goar Barsegıan aıtýynsha, ishki tuqym sharýashylyǵyn damytý — EAEO-nyń azyq-túlik qaýipsizdigin qamtamasyz etý quraldarynyń biri. Odaqta 2025 jyly negizgi taýarlar boıynsha azyq-túlikpen ózin-ózi qamtamasyz etý deńgeıi shamamen 93,5 paıyzǵa jetken. Sol sebepti ishki naryqty ózara tolyqtyrý úshin budan da pármendi sharalar qajet.
Eske salaıyq, byltyr Qazaqstanda sýdy az qajet etetin jańa kúrish sorty shyǵaryldy.
