EAEO múshe elderdiń úkimet basshylary birqatar qujatqa qol qoıdy

ALMATY. KAZINFORM – Qazaqstan Premer-mınıstri Oljas Bektenov Almatyda ótken Eýrazııalyq úkimetaralyq keńes otyrysynda EAEO-ǵa qatysýshy elder úkimetteriniń basshylarymen Odaq sheńberindegi ózara is-qımyldyń negizgi aspektileri men yntymaqtastyqtyń keleshegin talqylady.

 Кедергісіз сауда, бизнес және туризм: ЕАЭО мүше елдердің үкімет басшылары бірқатар құжатқа қол қойды
Фото: Александр Павский/Kazinform

Kedergisiz saýdany damytý, iskerlik ahýaldy qalyptastyrý, týrıstik áleýetti ashý máseleleri qaraldy.

Otyrysqa Eýrazııalyq ekonomıkalyq odaqqa múshe memleketter delegatsııalarynyń basshylary: Belarýs Respýblıkasynyń Premer-mınıstri Roman Golovchenko, Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Qasymalıev, Reseı Federatsııasy Úkimetiniń tóraǵasy Mıhaıl Mıshýstın, Armenııa Respýblıkasynyń vıtse-premeri Mger Grıgorıan; EAEO baqylaýshy elderi delegatsııalarynyń basshylary: Iran Islam Respýblıkasynyń birinshi vıtse-prezıdenti Aref Mohammad-Reza; Ózbekstan Respýblıkasynyń Premer-mınıstri Abdýlla Arıpov, Ázerbaıjan Premer-mınıstri Álı Idaıat oǵly Asadov, EEK alqasynyń tóraǵasy Baqytjan Saǵyntaev qatysty.

QR Premer-mınıstri Oljas Bektenov óz sózinde Odaq elderi arasyndaǵy saýdany damytý men ekonomıkalyq ıntegratsııanyń mańyzdylyǵyna erekshe nazar aýdardy.

– Qazaqstan Prezıdenti Qasym-Jomart Kemeluly Toqaev Eýrazııalyq ekonomıkalyq odaq ekonomıkalyq ıntegratsııa jáne ózara saýda-sattyqty damytý úderisi tabysty júzege asyryp jatqan asa mańyzdy alańdardyń biri retinde óziniń tıimdiligin dáleldegenin atap kórsetti. Sonymen qatar ulttyq deńgeıde, sondaı-aq EAEO sheńberinde syrtqy jaǵdaılarǵa tıimdi beıimdelý múmkindigi bizdiń ekonomıkalarymyzdyń básekege qabilettiligin qamtamasyz etýdiń negizgi faktoryna aınalady, - dep atap ótti Oljas Bektenov.

Qazaqstandyq tarap Odaq sheńberinde birlesken jumystyń birqatar basym baǵytyn atap ótti.

Qazir EAEO quqyqtyq júıesi ekonomıkalyq birlestikke múshe elderge belgili bir ónimderdi ákelýge ýaqytsha veterınarııalyq jáne fıtosanıtarııalyq sharalardy engizýge múmkindik beredi.

Mundaı sharalardy qoldaný shekteý belgilegen memleket aýmaǵy arqyly tranzıtke tosqaýyl qoıady, sol arqyly mejeli elge kirýge tyıym salynady. Saýda qatynastarynda kedergisiz orta qurýdyń mańyzdy ekeni basa aıtyldy.

Qazaqstan Premer-mınıstri ornyqty ekonomıkalyq ósýdi qamtamasyz etý úshin qolaıly bıznes-orta qalyptastyrýdyń mańyzdylyǵyna toqtaldy.

Odaq aýmaǵynda retteýshi jáne naqty áserlerdi baǵalaý tetigi jumys isteıdi. Kásipkerlik qyzmetti júrgizý jaǵdaıyn jaqsartý úshin birlestik sheńberinde halyqaralyq sharttarǵa naqty áserdi baǵalaý tetigin qoldanýdy keńeıtý usynyldy.

Sondaı-aq týrıstik saladaǵy yntymaqtastyqtyń keleshegine nazar aýdaryldy. Tanymal baǵyttar men kórikti jerler týraly biryńǵaı aqparattyq resýrs qurý boıynsha jumysty kúsheıtý jóninde usynys engizildi.

Otyrys qorytyndysy boıynsha qatysýshylar EAEO-nyń ekonomıkalyq áleýetin nyǵaıtýǵa, iskerlik ahýaldy jaqsartýǵa jáne birlesken jobalardy iske asyrýǵa baǵyttalǵan birqatar qujattarǵa qol qoıdy.

Eske salaıyq, Almatyda Digital Almaty-2025 tsıfrlyq forýmy ótip jatyr. Oǵan 40 myńnan asa adam qatysyp jatyr.

Сейчас читают