EAEO mınıstrleri Qazaqstannyń agrarlyq ǵylymy men AÓK-tegi zamanaýı tehnologııalarymen tanysty
ASTANA. KAZINFORM - Almatyda EAEO-ǵa múshe memleketterdiń aýyl sharýashylyǵy vedomstvolarynyń basshylary qazaqstandyq agrarlyq ǵylymnyń ozyq ázirlemelerimen, zamanaýı bilim berý tásilderimen jáne aýyl sharýashylyǵy óndirisinde qoldanylyp júrgen ınnovatsııalyq tehnologııalarmen tanysty.
QR Aýyl sharýashylyǵy mınıstrligi baspasóz qyzmetiniń habarlaýynsha, 13 tamyzda ótken EAEO-nyń Agroónerkásiptik saıasat jónindegi keńesiniń 7-otyrysy aıasynda delegatsııa Qazaq ulttyq agrarlyq zertteý ýnıversıteti – «Ulttyq agrarlyq ǵylymı-bilim berý ortalyǵy» KEAQ-qa bardy.
Іs-sharanyń negizgi taqyryby agrarlyq ǵylym, bilim jáne ınnovatsııalar salasyndaǵy ǵylymı-tehnologııalyq yntymaqtastyqty damytý jáne Odaq elderi arasyndaǵy praktıkalyq ózara is-qımyldy keńeıtý boldy.
Delegatsııa quramynda Eýrazııalyq ekonomıkalyq komıssııa Alqasynyń múshesi – ónerkásip jáne agroónerkásiptik keshen mınıstri Goar Barsegıan, Reseı Federatsııasynyń aýyl sharýashylyǵy mınıstri Oksana Lýt, Qyrǵyz Respýblıkasynyń Mınıstrler Kabıneti Tóraǵasynyń orynbasary – sý resýrstary, aýyl sharýashylyǵy jáne qaıta óńdeý ónerkásibi mınıstri Erlıst Akýnbekov boldy.
Qonaqtarǵa QazUAAZÝ-dyń ǵylymı jáne bilim berý áleýeti, agrarlyq óndiristiń tıimdiligi men tehnologııalyq deńgeıin arttyrýǵa baǵyttalǵan sheshimder tanystyryldy.
-Búginde bizdiń elderimizdiń agrarlyq sektorynyń aldynda ortaq mindetter tur. Olar – eńbek ónimdiligin arttyrý, tabıǵı resýrstardy tıimdi paıdalaný, tsıfrlandyrý jáne ınnovatsııalardy engizý. Osyǵan baılanysty agrarlyq ǵylym men sapaly kadrlar daıarlaýdyń mańyzy arta túsýde. QazUAAZÝ sııaqty alańdar ǵylymı áleýetti, bilim berýdi jáne salanyń naqty qajettilikterin biriktirýge múmkindik beredi, – dedi QR Aýyl sharýashylyǵy mınıstri Aıdarbek Saparov.
Mınıstrler qurǵaq óńirlerde joǵary tıimdi aýyl sharýashylyǵyn júrgizý jónindegi Qazaqstan-Qytaı halyqaralyq birlesken zerthanasyna bardy. Sondaı-aq UAǴBO ǵylymı-zertteý ınstıtýttarynyń ázirlemeleri usynylǵan kórmeni tamashalady.
Sapardyń mańyzdy bóligi halyqaralyq ǵylymı-bilim berý jobalarymen tanysý boldy. Atap aıtqanda, Nebraska – Lınkoln ýnıversıtetimen birlesip qurylǵan «Extension» jáne «One Health» ortalyqtarynyń qyzmeti tanystyryldy. Olardyń jumysy halyqaralyq ǵylymı áriptestikti damytýǵa, ozyq bilim men tehnologııalardy transferleýge, praktıkaǵa baǵdarlanǵan kadrlar daıarlaýǵa jáne zamanaýı AÓK-te suranysqa ıe quzyretterdi qalyptastyrýǵa baǵyttalǵan.
Sapar qorytyndysy boıynsha taraptar agrarlyq ǵylym men ınnovatsııalar salasyndaǵy yntymaqtastyqty odan ári keńeıtýge, birlesken zertteýlerdi damytýǵa, tehnologııalar men quzyrettermen almasýǵa, sondaı-aq AÓK úshin jańa býyn mamandaryn daıarlaýǵa múddeli ekenin jetkizdi.
Osyǵan deıin Irannyń Qazaqstannan aýyl sharýashylyǵy ónimderiniń ımportyn ulǵaıtýǵa múddeli ekeni týraly jazdyq.
