EAEO mınıstri Jaqsylyqov bıznesmenderge keńes berdi

ASTANA. QazAqparat - EAEO kollegııasynyń múshesi, ekonomıka jáne qarjy saıasaty jónindegi mınıstr Tımýr Jaqsylyqov otandyq bıznesmendermen kezdesip, odaq aıasyndaǵy ákimshilik kedergilerdi talqylady, dep xabarlaıdy QazAqparat tilshisi.

Mınıstrdiń aıtýynsha, Eýrazııalyq ekonomıkalyq odaqty qurýdyń aldynda barlyq memleketter atalǵan bastamany op-ońaı iske asyra alady dep oılady. Keden men salyqty rettep alǵannan keıin odaq ishindegi taýarlar eshbir kedergisiz aınalymǵa túsedi degen túsinik boldy. Alaıda, shyn máninde, olaı emes bolyp shyqty. Negizgi toqsaýyldardy alyp tastasa da, jergilikti jerde ákimshilik kedergiler joıylǵan joq. Al atqarýshy organdardyń keıbir normatıvtik aktileri jalpyǵa birdeı kelisimderge qarama-qaıshy bolyp jatady.

«Biz úshin keri baılanystyń bolǵany qajet. Joǵaryda qabyldanatyn sheshimder jergilikti jerde qalaı iske asyp jatyr? Sony bilip otyrýymyz qajet. Onsyz naqty qaı baǵytta jumys isteý qajettigin anyqtaı almaımyz. Negizi, búginde komıssııa óz sheshimderdiń jobalaryn aldymen talqyǵa shyǵaryp otyrady. Oǵan bıznesmender de qatysa alady. Atalǵan mexanızm úsh jyl buryn iske qosyldy. Sonyń arqasynda ákimshilik kedergilerge qatysty máselelerdi barynsha eskerýge múmkindik bar. Ókinishke qaraı, bıznes der kezinde ún qospaıdy. Sheshim jobasynda artyq protsedýralar men qosymsha shyǵyndar engizilse de, kásipkerler úndemeı jatady», - dedi T.Jaqsylyqov Astanada ótken kezdesýde.

Onyń sózine qaraǵanda, komıssııanyń sheshimderine qatysty bir paradoks bar. Belgili bir jobaǵa artyq protsedýralar men qosymsha shyǵyndar engizilse, bıznesmender ol jaıynda bilmeı júredi. Artynan EAEO-tyń kásipkerlik departamenti olarǵa xabarlap jatady. «Negizi, sheshim qabyldanbaı turyp, bıznesmender óz eskertýlerin jasap, qarsylyqtaryn bildirýi kerek. Sebebi biz ol sheshimdi ázirlegenderge naqty faktilerdi usynýymyz qajet. Kásipkerler ol aqparatty bermese, komıssııanyń sheshimin ózgertý qıyn. Sondyqtan bıznesmenderge aıtarym, Eýrazııalyq ekonomıkalyq odaqtyń resmı saıtyn únemi baqylap, komıssııanyń barlyq sheshimderine qatysty eskertýler men usynystardy joldap otyryńyzdar. «Atameken» palatasy da osy jumysty úılestirip, barlyq usynystardy erterek jiberip otyrsa, jaqsy bolatyn edi. Áıtpese, qandaı da bir sheshim kollegııanyń sońǵy otyrysynda talqylanǵanda ózgerister men túzetýlerdi engizgen ońaı emes», - dep atap kórsetti T.Jaqsylyqov.


Foto: strategy2050.kz