EAEO men BAÁ arasyndaǵy ekonomıkalyq áriptestik týraly kelisim 2026 jylǵy 6 qazanda kúshine enedi
ASTANA. KAZINFORM — Eýrazııalyq ekonomıkalyq komıssııa men Birikken Arab Ámirlikteri Eýrazııalyq ekonomıkalyq odaq pen BAÁ arasyndaǵy ekonomıkalyq áriptestik týraly kelisimniń kúshine enýine qajetti ishki rásimderdiń aıaqtalǵanyn rastaıtyn resmı habarlamalar almasty. Kelisimge 2025 jylǵy 27 maýsymda Mınskide qol qoıylǵan. Bul týraly EAEO-nyń resmı saıty habarlady.
Eýrazııalyq ekonomıkalyq komıssııa Saýda mınıstri Andreı Slepnevtiń aıtýynsha, kelisimge sáıkes, qajetti rásimderdiń aıaqtalǵanyn rastaıtyn notalar almasqannan keıin qujattyń kúshine enýine 60 kún beriledi. Osylaısha, kelisim 2026 jylǵy 6 qazanda kúshine enedi.
Qazirgi tańda Birikken Arab Ámirlikteri — EAEO-nyń negizgi saýda seriktesteriniń biri. Eýrazııalyq «bestik» elderi men BAÁ arasyndaǵy taýar aınalymy turaqty túrde ósip keledi. 2025 jyly bul kórsetkish 2024 jylmen salystyrǵanda 12% artqan.
Kelisim aıasynda jańa saýda rejımi qalyptasady. BAÁ EAEO elderiniń eksportyna taýar nomenklatýrasynyń 86%-y nemese eksport kóleminiń 98%-y boıynsha jeńildikti naryqtyq qoljetimdilik usyndy.
Bul jeńildikter EAEO elderiniń eksporttaýshylaryna kedendik bajdardy tóleý kezinde jyl saıyn keminde 266 mln dollar únemdeýge múmkindik beredi.
— Kelisim kúshine engennen keıin elderimiz arasyndaǵy jyldyq taýar aınalymy keminde 5-6 mlrd dollarǵa artady dep kútip otyrmyz, — dedi Andreı Slepnev.
Jeńildikti qoljetimdilik EAEO elderiniń negizgi aýyl sharýashylyǵy ónimderine, onyń ishinde astyqqa (bıdaı, arpa, júgeri), etke (iri qara, qoı eti, sýbónimder), qus etine, jumyrtqaǵa, keptirilgen kókónisterge (noqat, burshaq, jasymyq, úrme burshaq), ósimdik maıyna, sút ónimderine, kondıterlik ónimderge, mıneraldy sýǵa, tosap pen shokoladqa beriledi.
Ónerkásip salasynda metallýrgııa ónimderiniń keń túrine, munaı ónimderine (jeńil jáne basqa da dıstıllıattardy qosa alǵanda), orman ónerkásibi ónimderine, tsellıýlozaǵa, baspa ónimderine, hımııa ónerkásibi taýarlaryna, sondaı-aq týrbınalardan bastap jekelegen sorǵy túrlerine deıingi mehanıkalyq jabdyqtardyń keń aýqymyna jeńildikter qarastyrylǵan.
Óz kezeginde Birikken Arab Ámirlikteri tutyný taýarlarynyń keń nomenklatýrasy boıynsha jetkizilim kólemin arttyra alady. Sondaı-aq EAEO elderi ımporttaýǵa múddeli birqatar mańyzdy taýarlardy jetkizý múmkindigine ıe bolady.
— Sondaı-aq kelisimde bekitilgen retteýshi normalar bıznes arasyndaǵy ózara is-qımyldy jańa deńgeıge kóteredi dep kútemiz. Saýdany retteýdiń naqty ári ashyq erejelerin bekitý bıznestiń ózara saýdaǵa degen qyzyǵýshylyǵyn arttyrady, — dedi Andreı Slepnev.
Kelisimde álemdik saýda saıasatyndaǵy qazirgi syn-qaterlerge jaýap beretin zamanaýı retteýshi erejeler de qamtylǵan. Atap aıtqanda, elektrondy saýda, ekonomıkalyq yntymaqtastyq jáne shaǵyn ári orta bıznesti halyqaralyq saýdaǵa tartý máseleleri qarastyrylǵan.
Andreı Slepnevtiń aıtýynsha, Soltústik–Ońtústik ekonomıkalyq dálizi BAÁ arqyly ótedi. Bul EAEO eksporttaýshylary úshin Parsy shyǵanaǵy men Úndi muhıty jaǵalaýyndaǵy basqa elderdiń naryqtaryna shyǵýǵa qosymsha múmkindik beredi. Sonymen qatar Ońtústik Azııa elderimen saýdany damytýǵa da áleýet qalyptasady.
Eske salaıyq, buǵan deıin Premer-mınıstr Oljas Bektenov Sholpan-Atada Eýrazııalyq úkimetaralyq keńestiń shaǵyn quramdaǵy otyrysyna qatysqanyn habarlaǵan edik.
