EAEO memleketteriniń tehnoparkteri birigýi múmkin - vıtse-mınıstr

ALMATY. QazAqparat - EAEO memleketteriniń tehnoparkteri bir jobany bastaý úshin birigýi múmkin. Ol týraly «Jahandaný dáýirindegi tsıfrlyq kún tártibi 2.0» forýmynda QR Aqparat jáne kommýnıkatsııalar mınıstrliginiń vıtse-mınıstri Dınara Şeglova málimdedi, dep xabarlaıdy QazAqparat tilshisi.

«Biz byltyrǵy forýmnan bastap EAEO memleketterimen birge jumys isteımiz dep sheshkenbiz. Bul joly tehnoparkterdiń birigýi men ınnovatsııalyq ekojúıe týraly aıtamyz. Bul yntymaqtastyq birlesken jobamyzdy iske asyryp, tsıfrlyq ekonomıkany biz kútkendeı deńgeıge jetkizýge kómektesedi. Sonymen qatar, birlese otyryp, ǵylymı-zertteý jumystaryn júrgizemiz. Búgin EAEO memleketteri tehnoparkteriniń basyn qosatyn memorandýmǵa qol qoıamyz degen oıdamyn», - dedi Dınara Şeglova.

Sondaı-aq, spıker «Astana Habtyń» jetistikteri men memleket qyzyǵyp otyrǵan ózge de jobalar týraly aıtyp berdi.

«Ózderińiz biletindeı, astanalyq tehnopark byltyr ashylǵan bolatyn. Bul - Qazaqstan men IT qaýymdastyq úshin aıtarlyqtaı mańyzdy oqıǵa. Biz osyndaı ınnovatsııalyq jobalardy kópten beri kútken edik. Tabysty jobalarmen akseleratsıondyq baǵdarlama júrgizdik. Eksportqa jumys jasaıtyn jobalar da bar. Mysaly, Sıngapýr men Malaızııada «Astana habtyń» bıometrııaǵa qatysty jobasyna kópshilik qyzyǵýshylyq tanytty. Bizdiń startaptar álemniń 100 myqty jobasy kirgen halyqaralyq Azııa olımpıadasyna qatysty. Biz ony Qazaqstannyń startaperleri úshin úlken jetistik dep bilemiz. Akseleratsıondyq baǵdarlama aıasynda ınvestıtsııalar kelip jatyr. Jalpy, ol biz úshin óz jobańdy kórsetý ǵana emes, sondaı-aq, bir-birimen tájirıbe almasý», - dedi ol.

QR Aqparat jáne kommýnıkatsııalar mınıstriniń orynbasary «Astana Hab» baǵdarlamalaryna shamamen 1,5 myń ázirleýshi qatysatynyn jetkizdi. Onyń ishinde 300 adam - turaqty rezıdentter.

Elaman Turysbekov