EAEO kelesi sammıti Sankt-Peterbýrgte ótedi
ASTANA. KAZINFORM – Joǵary Eýrazııalyq ekonomıkalyq keńestiń kelesi otyrysy 2026 jyldyń jeltoqsan aıynda Reseıdiń Sankt-Peterbýrg qalasynda ótedi. Bul týraly Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev málimdedi.
Búgin Astanada Joǵary Eýrazııalyq ekonomıkalyq keńes aıasynda V Eýrazııalyq ekonomıkalyq forým ótti. Oǵan álemniń 44 elinen shamamen 3 myń adam qatysty.
Forýmnyń iskerlik baǵdarlamasyna 30-ǵa jýyq is-shara endi. Negizgi taqyryptar EAEO-daǵy ıntegratsııalyq protsesterdiń eń ózekti ári suranysqa ıe máselelerine arnaldy.
– EEF-2026 aıasyndaǵy mańyzdy oqıǵalardyń biri – Eýrazııalyq ekonomıkalyq odaq elderi kóshbasshylarynyń EAEO sheńberinde jasandy ıntellektini jaýapkershilikpen damytý týraly birlesken málimdeme qabyldaýy boldy. Bul qujattyń mańyzdylyǵy Qazaqstan Prezıdenti Qasym-Jomart Toqaevtyń Qazaqstannyń 2026 jyly odaq organdaryna tóraǵalyq etýine oraı EAEO-ǵa múshe memleketter basshylaryna joldaǵan úndeýinde atap ótildi. Qujat JI tehnologııalaryn ulttyq basymdyqtar men tsıfrlyq egemendikti eskere otyryp qoldanýǵa baǵyttalǵan, – dedi B. Saǵyntaev elordada BAQ ókilderine arnalǵan brıfıngte.
Sonymen birge, forým aıasynda ózara is-qımyldyń túrli baǵyttary boıynsha birqatar memorandýmdar, kelisimder men hattamalarǵa qol qoıylyp, birlesken is-sharalar josparlary bekitildi.
Aıta keteıik, EAEO elderi jasandy ıntellektini jaýapkershilikpen damytý týraly birlesken málimdeme qabyldady.
