EAEO ishindegi kedergiler ınvestorlardyń senimine selkeý túsirýi múmkin - Prezıdent
«Bizge odaqtyń ortaq naryǵyn dempıngten, kontrafakti taýarlardan jáne úshinshi elderdiń tarapynan josyqsyz básekeden qorǵaý bóliginde kúsh-jigerimizdi úılestirý qajet. Sonymen qatar, biz dáıekti, keı jerlerde maqsatty túrde birlesken kúsh-jigerimizben taýarlarymyzdyń úshinshi elderdiń naryǵyna shyǵýyna qol jetkizýmiz kerek», - dedi Q.Toqaev.
Qazaqstan Prezıdenti odaqqa múshe elderdiń bıznesi úshin barynsha qolaıly saýda rejimin jasaý, kedergilerdi joıý, úshinshi elderge eksporttalatyn taýarlardyń tranzıtine qolaıly rejim qoldaný máselelerine nazar aýdartty.
«Ókinishke qaraı, odaq ishindegi saýda úshin kedergiler men tosqaýyldardyń saqtalýy otandyq, sonymen qatar bizdiń ıntegratsııalyq jobamyzǵa sheteldik ınvestorlardyń senimin tómendetýi múmkin. EAEO-nyń ortaq keden shekarasyndaǵy kedendik ákimshileýdiń laıyqty deńgeıin qamtamasyz etý máselesi de ózekti bolyp otyr. Qysqa qana kezeńniń ishinde ótkizý, tekserý beketterin, ózge de kedendik jáne shekara mańy ınfraqurylymyn materıaldyq-tehnıkalyq jaraqtandyrý kúrdeli ekenin túsinemiz. Degenmen, eń aldymen bizdiń keden qyzmetterin biryńǵaı ádistememen, ádispen jáne tájirıbemen qamtamasyz etý túbegeıli mańyzdy dep sanaımyz. Bul taýarlardy jikteý, kedendik qunyn anyqtaý jáne ımporttalatyn taýardy tolyqqandy esepke alý máselelerine qatysty», - dedi Qasym-Jomart Toqaev.
Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Qyrǵyz Respýblıkasynyń Prezıdenti Sooronbaı Jeenbekov, RF Prezıdenti Vladımır Pýtın, Belarýs Respýblıkasynyń Prezıdenti Aleksandr Lýkashenko, Armenııa Respýblıkasynyń Premer-mınıstri Nıkol Pashınıan, sonymen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysty.
