EAEO-ǵa múshe memlekettermen shekarada elge taýarlar ákelý monıtorıngi kúsheıdi – Qarjy mınıstri
«Kirister boıynsha jospar transfertterdi esepke almaǵanda 100,6 paıyzǵa oryndaldy. 2019 jylǵy 1 qańtardan bastap elektrondyq túrdegi shot-faktýralardy mindetti túrde jazyp berý elimizde óndiriletin taýarlarǵa salynatyn qosylǵan qun salyǵy boıynsha túsimderdiń 1,5 esege ósýin qamtamasyz etti. Óz kezeginde korporatıvtik tabys salyǵy boıynsha túsimder 17 paıyzǵa ósti. Eýrazııalyq ekonomıkalyq odaqqa múshe memlekettermen shekarada elge taýarlar ákelý monıtorıngi kúsheıdi», - dedi mınıstr.
Onyń sózine qaraǵanda, jalpy alǵanda ákimshilendirý sharalaryn kúsheıtý men tsıfrlandyrý esebinen 900 mlrd teńgeden astam túsimder qamtamasyz etildi.
«Esepti qaraý kezinde kiris bóliginiń atqarylýy jóninde eskertýler aıtyldy. Birinshiden, zańdy tulǵalardan alynatyn korporatıvtik tabys salyǵy úlesiniń tómendeýine qatysty. Korporatıvtik tabys salyǵy túsimderiniń joǵary qarqynyna qaramastan, onyń úlesiniń tómendeýi, negizinen qosylǵan qun salyǵy úlesiniń 11 paıyzdyq tarmaqqa artýymen túsindiriledi. Ekinshiden, tólemderdi avanstaý esebinen respýblıkalyq bıýdjettiń kiris bóliginiń atqarylýy týraly eskertýge qatysty. Bul másele ádisnamalyq sıpatqa ıe, sondaı-aq Ekonomıkalyq yntymaqtastyq jáne damý uıymy elderin (AQSh, Frantsııa, Lıýksembýrg) qosa alǵanda, halyqaralyq praktıkaǵa sáıkes keletin tájirıbe. Avanstyq tólem mehanızmi bıznes sýbektileriniń ózderine de qolaıly», - dedi E. Jamaýbaev.
Úshinshiden, 2019 jyly Jalpy ishki ónimge shaqqandaǵy shoǵyrlandyrylǵan bıýdjet salyq túsimderiniń tómendegeni atap ótildi.
Bul jaǵdaıǵa munaıdyń álemdik baǵasynyń 10 paıyzǵa arzandaýy tikeleı sebep boldy.
«Salyqtyq jeńildikter men preferentsııalar máselesine qatysty Úkimet olardy ońtaılandyrý úshin tıisti jumys júrgizip jatqanyn atap ótkim keledi», - dedi vedomstvo basshysy.
