EAEO-ǵa múshe memleketterge elektromobılderdi bajsyz ótkizý 2 jylǵa uzartyldy
Máskeýde ótken EEK keńesiniń kezekti otyrysynda odaqtas elderdiń ıntegratsııasyndaǵy kedergilerdi joıatyn jáne saýda-ekonomıkalyq qatynastaryn jeńildetetin birqatar sheshim qabyldandy, dep habarlaıdy Kazinform.
«Qazaqstan EAEO-ǵa múshe memleketterdiń memlekettik satyp alýlary aıasynda alynatyn taýarlardyń tizbesin kezeń-kezeńmen keńeıtýde. Tizim taǵy bir pozıtsııaǵa keńeıdi – bul kıim-keshek pen kerek-jaraqtar, onyń ishinde qolǵaptar, rezeńke qolǵaptar bar.
Eske sala keteıik, bıyl otandyq kásipkerlerdiń EAEO-ǵa múshe basqa memleketterdiń 63 taýar túri boıynsha memlekettik satyp alýlaryna qoljetimdiligi qamtamasyz etildi. Budan basqa óndiristik jáne tehnologııalyq operatsııalardyń biryńǵaı sharttary kózdelmegen 276 taýar pozıtsııasy boıynsha ST-1 sertıfıkatyn paıdalaný múmkindigi 1 jylǵa uzartyldy», - delingen Saýda jáne ıntegratsııa mınıstrliginiń resmı saıtynda jarııalanǵan aqparatta.
Vedomstvo málimetinshe, EAEO-ǵa múshe memleketterdiń kedendik shekarasy men aýmaqtarynda veterınarııalyq baqylaýdy júzege asyrýdyń biryńǵaı tártibine ózgerister engizildi. Atap aıtqanda, birqatar termın túzetildi. Veterınarııalyq, dárilik, dıagnostıkalyq, dezınfektsııalyq jáne basqa da quraldardy, sondaı-aq jemshóp qospalaryn ákelý jáne aýystyrý sharttary, veterınarııalyq sertıfıkattardyń nysandary anyqtaldy. Veterınarııalyq baqylaý kezinde zerthanalyq synaqtar júrgizýdi uıymdastyrý bóligindegi normalar da tolyqtyryldy.
EEK keńesi 2024 jylǵa arnalǵan EAEO elderine sıyr etin bajsyz ótkizý kvotalaryn bekitti. Qazaqstanda ettiń osy túriniń óndirisi ishki qajettilikti is júzinde tolyǵymen jabatynyn eskere otyryp, elimiz úshin kvota mólsheri eń tómengi 5 myń tonna kóleminde (Reseı – 100 myń tonnaǵa deıin, Armenııa – 8,5 myń tonnaǵa deıin, Belarýs – 7,5 myń tonnaǵa deıin, Qyrǵyz Respýblıkasy – 3,5 myń tonnaǵa deıin) aıqyndaldy. Importtalǵan sıyr etiniń qosymsha kólemi óńdeýge baǵyttalatyn bolady. Bul shara elimizdegi shujyqtar men basqa da et ónimderiniń qunyn arzandatýǵa múmkindik beredi dep kútilýde.
«EAEO-ǵa múshe memleketterge elektromobılderdi bajsyz ótkizý eki jylǵa (2025 jylǵy 31 jeltoqsanǵa deıin) uzartyldy. Bul elektromobılder naryǵyn odan ári damytýǵa, zarıadtaý ınfraqurylymyn damytýǵa jáne iri qalalardaǵy ekologııalyq jaǵdaıdy jaqsartýǵa yqpal etedi», - dep atap ótedi mınıstrlikten.
Joǵary Eýrazııalyq ekonomıkalyq keńestiń kelesi jyly «Eýrazııalyq ekonomıkalyq jol» deklaratsııasyn iske asyrý jónindegi jol kartasyn daıyndaý týraly ókiminiń jobasy kelisildi. Ony Joǵary keńes bıylǵy jeltoqsan aıynyń sońynda bekitýdi josparlap otyr. Jobany bıylǵy qazan aıynda Bishkekte EAEO-ǵa múshe memleketterdiń úkimet basshylary maquldady. Bul qujat, basqalarmen qatar, qaýipsiz jáne básekege qabiletti ónim shyǵarýǵa umtylýǵa baǵyttalǵan EAEO quqyǵy aıasynda tehnıkalyq retteý jáne standarttaý salasyn odan ári damytýdy deklaratsııalaıdy. Tujyrymdama standarttardy birizdendirýdi ne úılestirýdi jáne sapa máselelerin ulttyq deńgeıden joǵary deńgeıge berýdi kózdemeıdi, óıtkeni EAEO týraly shartta tehnıkalyq retteýdiń negizgi qaǵıdattarynyń biri olardy qoldanýdyń eriktiligi dep tikeleı bekitilgen.
Sonymen qatar qarashada ótken EEK keńesinde úshinshi eldermen saýda jasaý kezinde tarıftik emes retteý sharalary qoldanylatyn taýarlardyń eksporty men ımportyna lıtsenzııalar men ruqsattar berý qaǵıdalarynyń jańa redaktsııasy bekitildi. Ózgerister avtomattandyrylǵan rejımde elektrondyq qujat aınalymyna kóshýge daıyn elderge lıtsenzııalardy avtomatty túrde berýge múmkindik beredi.
EEK Keńesiniń kelesi otyrysy 12 jeltoqsanda onlaın rejıminde ótedi. Ol 2023 jyly aıaqtalady.
