EAEO-ǵa múshe memleket basshylary koronavırýsqa baılanysty málimdeme jasady
«Biz, Joǵary Eýrazııalyq ekonomıkalyq keńestiń músheleri, memleketterimizdiń arasyndaǵy tyǵyz saıası, ekonomıkalyq, áleýmettik jáne tarıhı baılanystardy eskerip, 2014 jyldyń 29 mamyryndaǵy EAEO týraly shartta kórsetilgen maqsattar men qaǵıdattarǵa adal ekenimizdi qýattaı otyryp, Dúnıejúzilik densaýlyq saqtaý uıymy pandemııa dep jarııalap, qoǵamdyq densaýlyq saqtaý salasyndaǵy tótenshe jaǵdaı retinde sıpattalǵan COVID-19 – koronavırýs ınfektsııasynyń halyqaralyq deńgeıdegi mańyzǵa ıe bolyp, halyqtyń qozǵalysyn shektep, taýar jáne qyzmet saýdasyn qıyndatyp turǵanyn, jahandyq qarjylyq jáne shıkizat naryǵynda qubylmalylyqty týyndatqanyn, COVID-19 pandemııasy kezinde EAEO múshe memleketterdiń azamattaryn qoldaý jáne adamdardyń densaýlyǵy men ál-aýqatyn qamtamasyz etýde ujymdyq kúsh biriktirý qajettigin erekshe atap ótip, álemdik jáne aımaqtyq ekonomıka úshin dezıntegratsııa qaýpi týǵanyn nazarǵa ala otyryp, bul qaýipke birlese otyryp, qarsy turý týraly sharalardy biriktirýge daıyn ekenimizdi habarlaımyz», - delingen EAEO kóshbasshylarynyń birlesken málimdemesinde.
EAEO uıymynyń memleket basshylary COVID-19 pandemııasynyń jaǵymsyz saldaryn joıý boıynsha birlesken jumysty jalǵastyrýǵa, qol jetkizilgen ıntegratsııalyq yntymaqtastyq pen EAEO-ǵa múshe memleketterdiń ekonomıkalyq damýyn qoldaýǵa, memleketterimizdegi áleýmettik jáne makroekonomıkalyq turaqtylyqty qamtamasyz etýge, iskerlik jáne ınvestıtsııalyq belsendilikti qoldaýǵa daıyn ekenderin málimdedi.
«COVID-19 pandemııasymen kúres aıaqtalmaı qalǵan kooperatsııalyq baılanystardyń úzilýine, halyqaralyq saýdanyń toqtaýyna, ınvestıtsııalyq tartymdylyqtyń báseńdeýine alyp kelmeýi kerek degen nyq senimdemiz», - delingen qujatta.
EAEO basshylary sonymen qatar memleketterdiń bárin halyqaralyq yntymaqtastyqty qoldaýǵa, senimdi nyǵaıtýǵa, qarýly qaqtyǵystar men saýda soǵystaryn toqtatýǵa, halyqaralyq zańdardy qatań saqtaýǵa shaqyrdy.
«Biz halyqaralyq qaýymdastyqtardyń birligi men álemdik ekonomıkanyń turaqtylyǵyna, taýarlardyń, onyń ishinde áleýmettik mańyzy bar tamaq ónimderiniń, medıtsınalyq maqsattaǵy buıymdar men dári-dármektiń, jeke qorǵanys quraldarynyń qozǵalys erkindigi qaǵıdattarynyń saqtalýy jón dep esepteımiz», - dedi EAEO memleket basshylarynyń birlesken málimdemesinde.
Sonymen birge, qujatta EAEO elderiniń jedel jáne júıelik sıpattaǵy sharalary COVID-19 pandemııasynyń ıntegratsııalyq birlestiktegi elderdiń ekonomıkalaryna yqpalyn azaıtýǵa jáne birtutas ekonomıkalyq keńistiktiń jumys isteýin qamtamasyz etýge baǵyttalǵany da atalyp ótken.
«Biz búkil álemde COVID-19 pandemııasynan týyndaǵan shekteýler májbúrli shara ekenin jáne pandemııa toqtaǵannan keıin adam ómiri men densaýlyǵyna tóngen qaterlerdiń bári joıylady dep sanaımyz», - delingen birlesken málimdemede.
EAEO kóshbasshylary COVID-19 pandemııasymen kúres aıasynda bir-birine qajetti kómek kórsetýdi jalǵastyrýǵa, densaýlyq saqtaý júıesin nyǵaıtýǵa, ınfektsııalardyń aldyn alyp, dıagnostıkalaý jáne emdeý quraldaryn qurý salasynda birlesken zertteýler júrgizýge, epıdemııaǵa qarsy áreket etý algorıtmderin jetildirýge nıetti ekenin atap ótti.
Osy maqsatta EAEO jáne EEK múshe memleketteriniń úkimetterine, ortalyq (ulttyq) bankterine COVID-19 koronavırýs ınfektsııasynyń taralýyn boldyrmaý jáne aldyn-alý, ekonomıkalyq yntymaqtastyqty nyǵaıtý, ishki, sonyń ishinde azyq-túlik, naryqtar jumysynyń turaqtylyǵyn saqtaý jáne memleketter azamattaryna qoldaý kórsetý mindetteri tapsyryldy.
«Integratsııanyń artyqshylyǵy bizdiń memleketterimizge jáne halyqtarymyzǵa osy synaqty laıyqty túrde eńserýge múmkkindik beretinine nyq senemiz», - delingen qujatta.
Medet Ahmetov
