EAEO-ǵa múshe elderdiń tehnoparkteri ózara yntymaqtastyq týraly memorandýmǵa qol qoıdy
Forýmǵa Reseı, Belarýs, Qyrǵyz Respýblıkasy, Armenııa elderiniń premerleri qatysqan bolatyn.
Reseı Federatsııasynyń premer-mınıstri Dmıtrıı Medvedevtiń aıtýynsha, Reseı EAEO aımaǵynda jobalardy júzege asyrýǵa negiz beretin tikeleı tsıfrlyq tehnologııalardy engizýge basa den qoıǵan.
«Bizdiń elimizde tsıfrlyq baǵdarlama ulttyq modelge aınaldy. Biz aldaǵy 5 jylda bul salaǵa 1 trln 800 mlrd rýbl (30 mlrd dollar-avt) salýǵa nıettimiz. Bul qarajattyń jartysy federaldy bıýdjetten, qalǵany bıýdjetten tys qarjydan salynady. Bizdiń tájirıbemiz EAEO múshe elderi úshin paıdaly bolady dep senemin», - dedi Dmıtrıı Medvedev.
Belarýs premer-mınıstri Sergeı Rýmas ta eldegi dástúrli ekonomıkada tehnologııalyq, uıymdastyrýshylyq transformatsııa júrip jatqanyn aıtty.
«Bizde ınvestıtsııalyq jobalar júzege asyrylyp jatyr. Elimizde token men blokcheın tehnologııasyn paıdalanýǵa zańmen ruqsat berilgen. TMD elderinde birinshi bolyp krıptovalıýta shyqty. 2017 jyly joǵarǵy tehnologııalar parki rezıdentteri eksportynyń ózi 1 mlrd dollardan asty. 2018 jyly park eksportynyń qarqyny 30%-ǵa artpaq», - dedi Sergeı Rýmas.
Óz elindegi tsıfrlyq jetistikter týraly Qyrǵyz Respýblıkasynyń úkimet basshysy Muhammedqalyı Abylǵazıev aıtyp berdi.
«Qyrǵyzstanda «Digital Qyrǵyzstan» jobasy qolǵa alyndy. Bul jergilikti tsıfrlyq ınfraqurylymdy qamtıdy. Memlekettik qyzmet kórsetetin biryńǵaı portal ashyldy. Sonymen qatar, bıyl aýyl mektepterin ınternetke qosý qolǵa alynǵan. Bolashaqta ár aýyl jelige qosylatyn bolady», - dedi Qyrǵyz Úkimet basshysy.
Plenarlyq otyrys sońynda Astana Hub (Qazaqstan), «Skolkovo» (Reseı), «Kásiporyndar ınkýbatory» (Armenııa), «Joǵarǵy tehnologııalar parki» (Qyrǵyzstan) arasynda ózara yntymaqtastyq týraly memorandýmǵa qol qoıyldy.
