EAEO-ǵa múshe elderde júk tasymalyn qadaǵalaý úshin navıgatsııa plombasy qoldanylmaq

NUR-SULTAN. QazAqparat - Bıyl Qazaqstan Eýrazııalyq ekonomıkalyq odaqta tasymaldaýdy qadaǵalaý úshin navıgatsııalyq plomba qoldaný týraly kelisimge qol qoıýǵa nıetti, dep habarlaıdy QazAqparat Memlekettik kirister komıtetine silteme jasap.

Kelisimge qatysty jumysty 2017 jyldan bastap EAEO elderi sarapshylary jáne Eýrazııalyq ekonomıkalyq komıssııa qyzmetkerleri júrgizgen.

«Jumys kúrdeli boldy, barlyq múddeli memlekettik organdar men taraptardyń bıznes qoǵamdastyǵy qatysty, kóptegen pikir men ustanym boldy. Memleketishilik kelisýdiń eki kezeńi ótkizildi. Búgingi tańda barlyq kelispeýshilikter joıyldy», - dedi komıtet ókili.

Jalpy kelisim navıgatsııa plombasyn qoldana otyryp, taýardy EAEO-ǵa múshe eki jáne odan da kóp memlekettiń aýmaǵy boıynsha ótkizý kezinde olardy qadaǵalaý múmkindigin kózdeıdi. Árbir el navıgatsııa plombasyn qoldaný jónindegi jumysty uıymdastyrýdy júrgizetin ulttyq operatory bolady.

Bul rette kóliktiń ereksheligin eskere otyryp, taýarlardyń sanatyna baılanysty ótpeli kezeńder kózdelgen. Bul tasymaldaýdyń árbir kezeńin qadaǵalaı otyryp, navıgatsııa plombasyn qoldaný protsesiniń tıimdiligin jetildirýge múmkindik beredi.

«Bıznes úshin osy kelisimniń artyqshylyqtary EAEO keńistiginde óz taýarlarynyń qaýipsiz tranzıti múmkindiginde, EAEO baqylaýshy organdary tarapynan baqylaýdyń qosymsha nysandary men sharalaryn alyp tastaýda bolyp otyr. ıAǵnı, eger plomba salynǵan bolsa, onda EAEO-nyń árbir memleketinde taýardy, al keıbireýinde bir baǵyt úshin birneshe retten tekserýdiń qajeti joq. Mundaı jaǵdaı shyǵyndy aıtarlyqtaı azaıtady», - dep atap ótti Memlekettik kirister komıtetinde.

Memleket osy kelisimnen halyqaralyq tasymaldardyń ashyqtyǵyna, «jalǵan tranzıt» pen «jalǵan ımportty» joıýǵa jáne tıisinshe qazynaǵa túsetin kiristiń ulǵaıýyna qol jetkizbek.

Qazirgi ýaqytta qujattyń jobasy qoǵamdyq talqylaý úshin legalacts.egov.kz saıtyna ornalastyrylǵan.