EAEO-ǵa múshe elder qurylys salasyndaǵy qyzmetterdiń biryńǵaı naryǵyn qamtamasyz etpeıdi

NUR-SULTAN. QazAqparat - Eýrazııalyq úkimetaralyq keńestiń otyrysynda EAEO elderiniń úkimet basshylary eýrazııalyq ıntegratsııany damytýdyń 2025 jylǵa deıingi strategııalyq baǵyttaryn, sondaı-aq Odaqtyń ishki naryǵyndaǵy 2021-2022 jyldary joıylatyn bosatýlar men shekteýler tizimin talqylaıdy. Bul týraly Eýrazııalyq ekonomıkalyq komıssııa alqasy tóraǵasynyń kómekshisi Iıa Malkına onlaın-brıfıngide aıtty, dep habarlaıdy QazAqparat tilshisi.

«Eýrazııalyq ekonomıkalyq komıssııanyń ekonomıka jáne qarjylyq saıasat jónindegi alqa múshesi Tımýr Jaqsylyqov Eýrazııalyq ekonomıkalyq odaqtaǵy qurylys qyzmetteriniń biryńǵaı naryǵynyń jumys isteýin qamtamasyz etý úshin qajetti is-sharalar josparymen tanystyrady. 2014 jyly Odaq aıasynda Biryńǵaı naryqtyń qyzmet kórsetý salalarynyń tizbesi bekitilgen bolatyn. Bul tizimde ınjenerlik izdestirý, sáýlet-qurylystyq jobalaý, kúrdeli qurylys nysandaryn salý, qaıta qurý, jóndeý salasyndaǵy qyzmetter bar. Komıssııa ókilettiligine sáıkes, Odaq zańnamasynyń oryndalýyn baqylaý kezinde múshe memleketter qurylys ındýstrııasynda qyzmetterdiń biryńǵaı naryǵynyń jumys isteýin qamtamasyz etpeıtindigi anyqtaldy», - deıdi Iıa Malkına.

Atap aıtqanda, basqa múshe memleketterdiń zańdy tulǵalary ulttyq zańnamada qosymsha talaptar ornatý arqyly qyzmetterdi jetkizý jáne alý quqyǵymen shekteldi. Komıssııanyń pikirinshe, daıyndalǵan is-sharalar jospary osy máseleni sheshýge jáne qurylys salasyndaǵy qyzmetterdiń biryńǵaı naryǵynyń jumys isteýin qamtamasyz etýge múmkindik beredi.