EAEO eýrazııalyq qaıta saqtandyrý kompanııasyn qurady

MÁSKEÝ. QazAqparat - 25-26 tamyzda Cholpon-Atada ótken Eýrazııalyq úkimetaralyq keńestiń otyrysynda EAEO elderiniń úkimet basshylary Eýrazııalyq qaıta saqtandyrý kompanııasyn (ESK) qurý týraly kelisim boıynsha jumystardyń aıaqtalǵanyn málimdedi, dep habarlaıdy QazAqparat tilshisi Eýrazııalyq ekonomıkalyq komıssııanyń baspasóz qyzmetine silteme jasap.

ESK ózara jáne syrtqy saýdany yntalandyrýǵa, sondaı-aq EAEO aýmaǵynda saqtandyrý áleýetin jáne kásibı táýekelderdi basqarýdy arttyrý arqyly birlesken yntymaqtastyq jobalaryn iske asyrýǵa arnalǵan halyqaralyq qarjy uıymy mártebesin alady.

Kompanııa Odaq memleketteri men úshinshi elderdegi iskerlik jáne saıası táýekelderden eksporttyq nesıeler men ınvestıtsııalardy qaıta saqtandyratyn ulttyq saqtandyrý agenttikteriniń qyzmetin joǵary deńgeıde tolyqtyratyn bolady.

ESK jarǵylyq kapıtaly múshe memleketterdiń jarnalary esebinen qurylady jáne 15 mıllıard reseı rýblin quraıdy. Áleýetti saqtandyrý syıymdylyǵy –2 mlrd AQSh dollaryna deıin.

ESK 2023 jyly jumysyn bastaıdy jáne EAEO-ǵa múshe emes basqa memleketter men halyqaralyq qarjy uıymdarynyń kirýi úshin ashyq bolady dep josparlanyp otyr.