EAEO erkin saýda aımaǵyn keńeıte bastady

MÁSKEÝ.KAZINFORM - 2025 jyly Eýrazııalyq ekonomıkalyq odaqtyń (EAEO) negizgi ekonomıkalyq kórsetkishteri oń dınamıkany saqtap qaldy. Integratsııalyq birlestikke múshe elder arasyndaǵy ulttyq valıýtalarmen esep aıyrysý úlesi 93%-ǵa jetti, dep habarlaıdy agenttik tilshisi.

Bul týraly Eýrazııalyq ekonomıkalyq komıssııa Alqasynyń tóraǵasy Baqytjan Saǵyntaev Máskeýde ótken «Eýrazııalyq ıntegratsııa joldary: 2030 jylǵa qaraı qaıda baramyz?» atty ıntegratsııalyq forýmda málimdedi.

Onyń aıtýynsha, kedendik yntymaqtastyq, tehnıkalyq retteý jáne syrtqy saýda salalarynda kásipkerlerdiń problemalyq máselelerin sheshýge aıtarlyqtaı kóńil bólingen. 2025 jyly kelip túsken ótinishterdiń 94%-y rettelgen.

— Bul kórsetkishter eýrazııalyq ıntegratsııalyq jobanyń suranysqa ıe ekenin jáne bıznes pen retteýshi organdardyń, sonyń ishinde Komıssııanyń, tabysty ózara is-qımylyn naqty dáleldeıdi. Eýrazııalyq «bestik» elderiniń iskerlik qaýymdastyqtarynyń ıntegratsııalyq úderisterge tartylýy ulttyq ekonomıkalardyń básekege qabilettiligin qamtamasyz etýdiń negizgi elementine aınalyp otyr, — dep atap ótti EEK Alqasynyń tóraǵasy.

Kásiporyndardyń eksporttyq múmkindikterin keńeıtý de basym baǵyt bolyp qala beredi. Osy maqsatta Komıssııa 2025 jyly Indonezııa, Birikken Arab Ámirlikteri, Mońǵolııa elderimen saýda kelisimderine qol qoıdy. Iranmen erkin saýda aımaǵy týraly tolyq formattaǵy kelisim kúshine endi, Úndistanmen kelissózder jandandy. Týnıspen erkin saýda týraly kelisim jasasýdyń oryndylyǵy máselesi zerdelenip jatyr.

Buǵan deıin Qazaqstan Respýblıkasy Parlamentiniń Májilisi EAEO men Mońǵolııa arasyndaǵy ýaqytsha saýda kelisimin ratıfıkatsııalaǵany habarlanǵan bolatyn.