EAEO elderiniń kedendik baj úlesin esepteýdiń jańa ádistemesi engizilýi múmkin
ASTANA. KAZINFORM — Eýrazııalyq ekonomıkalyq komıssııanyń ekonomıka jáne qarjy saıasaty mınıstri Baqytjan Saǵyntaev Eýrazııa ekonomıkalyq odaǵyna múshe elderdiń kedendik baj úlesin qaıta qaraý máselesi nege kesheýildep jatqanyn aıtty.
— Reseı men Ýkraına arasyndaǵy soǵysqa baılanysty bul áńgime 2022 jyly bastalǵan. Óıtkeni taýarlar qazir ekonomıkalyq odaq elderine Qazaqstan men Qyrǵyzstan arqyly kirip jatyr. Sol kezde bul másele kóterilgen. Qazaqstan tarapy da aıtty. Eýrazııa ekonomıkalyq komıssııasynda qaraldy. Qazir taýar aǵyny túgel ózgerip jatyr. Sol sebepti bul Úkimet basshylarynyń keńesinde, tipti Memleket basshylary deńgeıinde de usynylǵan bolatyn. Sol jerde tıisti ádisteme jasaý kerek degen tapsyrma berilgen. Sol arqyly sheshemiz degen uıǵarym bolǵan, — dedi ol Astana halyqaralyq forýmynyń kýlýarynda
Aıtýynsha, ekonomıkalyq odaqqa múshe elderdiń úlesin esepteýdiń jańa nusqasyn engizýge Reseı men Belarýstiń asyǵatyn túri joq.
— Olar «Bulaı bolmaıdy, bul ýaqytsha bolyp jatqan dúnıe, keıin bári ornyna túsken kezde qaıtadan qalpyna qaıtyp kelemiz, sonda biz ár kezde aýysyp jatamyz ba» degen ýáj aıtyp otyr. Sodan bizdiń sarapshylar, úkimettegiler arasynda pikirtalas bolǵan kezde «onda ádistemesin jasaıyq, ártúrli jaǵdaı bolǵanda ádistemege súıeneıik» dedi. Áli aıtys bolyp jatyr.
Biraz áriptesterimiz jyly jaýyp qoıǵysy keledi, biraq ylǵı kóterip otyrmyz. Qazir ekonomıka, qarjy blogyn biz basqaryp otyrmyz. Árdaıym Qazaqstan úkimetimen tıisti jumysty istep jatyrmyz, — dedi Baqytjan Saǵyntaev.
Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr.