EAEO elderiniń basqa bir múshe memleketti uıymnan shyǵarýǵa quqyǵy joq - Pashınıan
EREVAN. KAZINFORM – Eýrazııalyq ekonomıkalyq odaq (EAEO) memleketteriniń uıymǵa múshe basqa eldi onyń quramynan shyǵarýǵa quqyǵy joq. Bul týraly BAQ ókilderiniń qatysýymen ótken baspasóz maslıhatynda Armenııanyń premer-mınıstri Nıkol Pashınıan aıtty, dep habarlaıdy Kazinform agenttiginiń Erevandaǵy menshikti tilshisi.
Brıfıng barsynda ol Qazaqstan, Reseı, Belarýs jáne Qyrǵyzstan ókilderiniń Eýrazııalyq úkimetaralyq keńes aıasynda ázirlegen Armenııanyń uıymnan yqtımal shyǵýyna qatysty baıandamasyna pikir bildirdi.
- Odaq elderiniń basqa bir múshe memleketti uıymnan shyǵarýǵa quqyǵy joq ekeni anyq. Mundaı múmkindik Ujymdyq qaýipsizdik týraly shart uıymynda (UQShU) bar. Osy rette EAEO memleketteriniń barlyǵy derlik UQShU-ǵa da múshe ekenin eskersek, Armenııany nelikten onyń quramynan shyǵarmaıtyny qyzyq, - dedi premer-mınıstr.
Nıkol Pashınıan baıandamada keltirilgen derekter men jasalǵan boljamdarǵa da toqtaldy.
- Biz bul derekter men boljamdardy áli de zerdeleımiz. Biz Armenııanyń úzdiksiz damýyn qamtamasyz etý, táýelsizdik pen egemendikti saqtaý jáne syrtqy baılanystardy ártaraptandyrýǵa basymdyq beremiz. Biz osy baǵyttaǵy saıasatymyzdy jalǵastyramyz, - dedi Armenııa úkimetiniń basshysy.
Eske salaıyq, birneshe kún buryn Qazaqstan, Reseı, Belarýs jáne Qyrǵyzstan ókilderiniń Eýrazııalyq úkimetaralyq keńes aıasynda daıyndaǵan birlesken baıandamasy jarııalandy. Onda Armenııanyń EAEO-dan shyǵýy el ekonomıkasyna qalaı áser etýi yqtımal ekeni jaıly boljam jasalǵan.
