EAEO elderinde elektrondy qyzmetterge jeńildetilgen salyq engiziledi
Búgin Májilistiń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa elektrondyq nysanda qyzmetter kórsetý kezinde janama salyqtar alý tártibin aıqyndaý bóliginde ózgerister engizý týraly hattamany ratıfıkatsııalaý týraly» Zańdy qabyldy, dep habarlaıdy Kazinform.
«Eýrazııalyq ekonomıkalyq odaq memleketteriniń basshylary ótken jyldyń 9 jeltoqsanynda Bishkek qalasynda Eýrazııalyq ekonomıkalyq odaq týraly shartqa elektrondyq nysanda qyzmetter kórsetý kezinde janama salyqtar alý tártibin aıqyndaý bóliginde ózgerister engizý týraly hattamaǵa qol qoıdy. Búgingi tańda bul hattamany 4 memleket ratıfıkatsııalady. Jalpy osy hattamany ratıfıkatsııalaý Qazaqstan Respýblıkasynyń strategııalyq basymdyqtaryna sáıkes keledi. Qazirgi ýaqytta Salyq kodeksinde Qazaqstan Respýblıkasynyń aýmaǵynda taýarlarmen elektrondyq saýdany júzege asyratyn sheteldik kompanııalardan qosylǵan qun salyǵyn alý tetigi men tártibi kózdelgen. Alaıda, jahandyq tendentsııalarǵa baılanysty rezıdent emester kórsetetin kóptegen qyzmetter elektrondy túrde kórsetiledi de olardy júzege asyrý ornyna baılanysty emes», - dedi zań jobasy týraly baıandaǵan Premer-Mınıstrdiń orynbasary – Qarjy mınıstri Erulan Jamaýbaev.
Onyń atap ótýinshe, munyń bári qyzmet kórsetý ornyn jáne QQS qaı jerde eseptelý kerektigin anyqtaýdy qıyndatady. Osyǵan baılanysty hattamamen birqatar tyń norma usynylady.
«Elektrondyq qyzmetter» uǵymy engizildi. Mundaı qyzmetterge aqparattyq-telekommýnıkatsııalyq jeli (elektr baılanysy jelisi, ınternet) arqyly kórsetilgen qyzmetter jatady. Qyzmetter tizimi naqtylandy. Atap aıtsaq, 14 qyzmet anyqtaldy. Mysaly, bıletterdi, qonaq úılerdi brondaý, baǵdarlamalardy usyný jáne taǵy basqalary. Elektrondyq qyzmet kórsetý orny anyqtaldy. Joǵaryda atalǵan tizbeden elektrondyq nysandaǵy qyzmetter boıynsha QQS túpkilikti eldiń qaǵıdaty boıynsha, ıaǵnı qyzmetti túpkilikti tutyný ornynda alynatyn bolady. Bul elektrondyq qyzmetter úshin QQS tóleý ornyn belgileý jónindegi daýlardy boldyrmaýǵa jáne bıýdjetke qosymsha qarajat túsýge yqpal etetin bolady», - dedi ol.
Mınıstrdiń aıtýynsha, jańa mehanızm EAEO-nyń barlyq memleketteri ratıfıkatsııalaǵannan keıin ǵana iske qosylady. Hattamany ratıfıkatsııalaý teris áleýmettik-ekonomıkalyq jáne quqyqtyq saldarǵa ákep soqtyrmaıdy.
