EAEO elderiniń úkimet basshylary Almatydaǵy EÚAK otyrysynda 11 máseleni qarastyrady

MÁSKEÝ. QazAqparat – 5 aqpan kúni Almatyda ótetin Eýrazııalyq úkimetaralyq keńesiniń kezekti otyrysy barysynda 11 másele qarastyrylady. Bul týraly búgin brıfıng kezinde EEK Alqa tóraǵasynyń kómekshisi Iıa Malkına málim etti, dep habarlaıdy QazAqparat.

«Otyrys Almaty qalasynda ótedi. Mundaǵy eki másele EEK Alqasynyń Qazaqstan men Belarýs elderiniń ishki naryqtar qyzmetiniń aıasynda mindettemelerdi oryndaý týraly sheshimderin ózgertýge baılanysty bolady. Másele EAEO elderine qara jáne tústi metaldar synyǵyn shyǵarýǵa tyıym salýdy tosqaýyl retinde taný týraly bolmaq. Úkimet basshylary EAEO-da arnaıy qorǵanys, dempıngke qarsy jáne óteý sharalaryn qoldaný mehanızmderin jetildirý boıynsha qadamdardy qarastyrady», - dep atap ótti Alqa tóraǵasynyń kómekshisi.

«Sondaı-aq, kún tártibinde paıdalanýshy elderdiń EAEO tarıftik preferentsııalary biryńǵaı júıesiniń tizimin ózektilendirý máselesi turady», - dep habarlady I.Malkına.

Úkimetaralyq keńes Odaq memleketteriniń ótkizý beketterinde elektrondyq qujat aınalymyn damytý kontseptsııasyn, Odaq memleketterinde ótkizilip júrgen asyl tuqymdy mal sharýashylyǵy salasyndaǵy selektsııalyq-tuqymdyq jumystyń úılestirilý tártibi men analıtıkalyq qamtamasyz etý tártibin qarastyrady.

Budan basqa, Komıssııa úkimet basshylaryna Odaq memleketterindegi makroekonomıkalyq jaǵdaı jáne turaqty ekonomıkalyq damýdy qamtamasyz etý usynystary týraly baıandamasyn usynady.