EAEO elderiniń sýtegi energetıkasy salasyndaǵy yntymaqtastyǵyn damytý sharalary bekitildi

MÁSKEÝ. QazAqparat - Eýrazııalyq ekonomıkalyq komıssııa alqasynyń otyrysynda «Eýrazııalyq ekonomıkalyq odaq elderiniń sýtegi energetıkasyn damytý perspektıvalary boıynsha taldaý nátıjeleri týraly» baıandama maquldanyp, EAEO elderi arasynda osy salada yntymaqtastyqty damytýǵa baǵyttalǵan usynym qabyldandy. Qujattar odaqtyń 2025 jylǵa deıingi ónerkásiptik kooperatsııanyń negizgi baǵyttaryn júzege asyrý maqsatynda ázirlendi, dep habarlaıdy QazAqparat EEK baspasóz qyzmetine silteme jasap.

Baıandama sýtekti óndirý, tasymaldaý, saqtaý jáne paıdalanýdyń negizgi tehnologııalarynyń keshendi taldaý, jekelegen elder mysalynda sýtegi energetıkasy salasyndaǵy álemdik tájirıbege sholý, EAEO memleketterindegi sýtegi energetıkasyn damytý tendentsııalary jónindegi aqparatty qamtıdy.

Qujatta sýtegi energetıkasyn damytýdyń áleýetti múmkindikteri men shekteýleri, odaq elderindegi tıisti jobalardy taldaýǵa erekshe kóńil bólingen. Sondaı-aq, salanyń normatıvtik-quqyqtyq bazasynyń qalyptasý dárejesi, eldiń resýrstary men áleýetin eskere otyryp, árbir múshe-memleket úshin damýdyń negizgi núkteleri men maqsattary belgilendi.

«Odaqtaǵy sýtegi energetıkasyn ilgeriletý úshin elderimiz arasyndaǵy ǵylymı-tehnıkalyq yntymaqtastyqty nyǵaıtýǵa, úsh baǵyt boıynsha sońǵy ázirlemelerdi, quramdas bólikter men daıyn ónimderdiń tájirıbelik úlgilerin jasaýǵa erekshe nazar aýdarý qajet. Bul sýtegin óndirýdi, tasymaldaýdy, saqtaýdy jáne paıdalanýdy (kólikte, ónerkásiptik óndiriste) qamtıdy», - dedi EEK Ónerkásip jáne agroónerkásiptik keshen mınıstri Artak Kamalıan.

Usynys EAEO-da sýtegi energetıkasy salasyndaǵy ǵylymı-tehnıkalyq yntymaqtastyqty damytýdyń perspektıvalyq baǵyttaryn anyqtaıdy, mysaly, atom elektr stantsııalarynyń elektr energııasyn, shaǵyn gıdro elektr stantsııalaryn jáne jańartylatyn energııa kózderin paıdalaný arqyly sý elektrolızi ádisimen tómen kómirtekti sýtegin alý, kómirsýtekterden ártúrli ádistermen tómen kómirtekti sýtekti alý; sýtekti syǵymdaý, suıyltý, saqtaý jáne tasymaldaý; sýtegi kóligi jáne ony qoldaný úshin qajetti ınfraqurylym; qatty oksıdti elektrolızerler men otyn elementterine, sondaı-aq sýtegin saqtaýdyń perspektıvaly tehnologııalaryn qoldanýǵa arnalǵan materıaldar.

Usynysty júzege asyrý odaq memleketteri arasyndaǵy sýtegi energetıkasy salasynda kooperatsııalyq baılanystardyń damýyna, ǵylymı-tehnıkalyq yntymaqtastyq, negizgi sýtegi tehnologııalary men jobalary boıynsha múshe memleketterdiń tájirıbe almasýyna, birlesken ǵylymı zertteýlerdi jáne bes eldiń uıymdarynyń atalǵan saladaǵy yntymaqtastyqtyń perspektıvalyq baǵyttary boıynsha tehnologııalardy ázirleýge septigin tıgizedi.

«Usynysty qabyldaý – EAEO-ǵa múshe memleketterdiń sýtegi energetıkasy salasyndaǵy ózara is-qımylyn ornatýdaǵy alǵashqy qadam», - dep atap ótti A.Kamalıan.

Foto: eec.eaeunion.org