EAEO elderiniń ortalyq bank basshylary ekonomıkalyq belsendilikti qalpyna keltirý jaıyn talqylady

NUR-SULTAN. QazAqparat - Ulttyq banktiń tóraǵasy Erbolat Dosaev Eýrazııalyq ekonomıkalyq odaqqa múshe memleketterdegi ortalyq bankterdiń Valıýtalyq saıasat jónindegi konsýltatsııalyq keńes otyrysyna qatysty, dep habarlaıdy QazAqparat Ulttyq banktiń baspasóz qyzmetine silteme jasap.

Konsýltatsııalyq keńestiń negizgi mindetteri valıýtalyq saıasatty úılestirý máselesi boıynsha EAEO-ǵa múshe memleketterdiń ortalyq bankteri arasyndaǵy yntymaqtastyqty damytý jáne tereńdetý, onyń ishinde ınflıatsııalyq protsesterge jáne makroekonomıkalyq turaqtylyqqa syrtqy kúızelisterdiń keri áserin azaıtý jónindegi saıasat sharalaryn ázirleý.

Otyrysqa qatysýshylar EAEO elderiniń qazirgi ekonomıkalyq ahýalyn, aqsha-kredıt saıasaty máselelerin, qarjy júıesin turaqtandyrý jáne memleketterdiń ekonomıkasyna koronadaǵdarystyń qolaısyz saldaryn azaıtý jónindegi sharalardyń tıimdiligin, sondaı-aq ekonomıkalyq belsendilikti odan ári nyǵaıtý boıynsha josparlardy talqylady.

Sonymen qatar taraptar EAEO qarjy naryǵyn retteý jónindegi ulttyq organdardan joǵary turatyn organdy qurý máselesin, onyń bolashaq ókilettikterin, qarjylandyrý kózderin, sondaı-aq EAEO organdary júıesindegi mártebesine toqtaldy. Ulttyq organdardan joǵary turatyn organdy qurý 2014 jylǵy 29 mamyrdaǵy «EAEO týraly» Kelisimde, sondaı-aq 2019 jylǵy 1 qazandaǵy «EAEO Ortaq qarjy naryǵyn qalyptastyrý» tujyrymdamasynda kózdelgen.

Otyrys barysynda qatysýshylar EAEO-ǵa múshe memleketterdiń aýmaǵyndaǵy bank jáne saqtandyrý sektorlarynda lıtsenzııalardy ózara tanýǵa kelisilgen tásilderdi aıqyndaıtyn standarttalǵan lıtsenzııa týraly kelisim jobasyn qarastyrdy.