EAEO elderiniń azamattary Qazaqstan bankterinen 120 mlrd teńge nesıe alǵan

ASTANA. QazAqparat – Búgin Senattyń jalpy otyrysynda «Eýrazııalyq ekonomıkalyq odaq sheńberinde kredıt tarıhynyń quramyna kiretin málimetterdi almasý tártibi týraly kelisimdi ratıfıkatsııalaý týraly» Zańy maquldandy, dep habarlaıdy QazAqparat tilshisi.

Kelisim kredıt tarıhynyń quramyna kiretin málimetterdi almasý tetigin, tártibi men sharttaryn aıqyndaıdy. Bir jaǵynan, basqa múshe memleketterdiń aýmaqtaryndaǵy bankterge kredıttik resýrstar úshin júgingen kezde, EAEO-ǵa múshe barlyq memlekettiń rezıdentteri úshin teń jaǵdaılar jasaýǵa jáne ekinshi jaǵynan, bankter úshin basqa múshe memleketterdiń rezıdentterine nesıe berý týraly sheshimder qabyldaý kezinde táýekelderdi sapaly baǵalaý múmkindigin qamtamasyz etýge baǵyttalǵan. Bul óz kezeginde EAEO aıasynda transshekaralyq kredıt berýdi damytýǵa yqpal etedi.

Budan basqa, Kelisim múshe memleketterdiń qarjy naryǵyn retteıtin organdardyń ókilettikterin aıqyndaıdy.

«Qazirgi kezde EAEO elderindegi kez kelgen rezıdent, ıaǵnı jeke nemese zańdy tulǵalar Eýrazııalyq ekonomıkalyq odaq aýmaǵyndaǵy memleketterdegi ekinshi deńgeıli bankten nesıe ala alady. Ulttyq bank málimetine qaraǵanda, bıylǵy 1 naýryzdaǵy jaǵdaı boıynsha EAEO-nyń basqa elderiniń 2 myńǵa jýyq jeke jáne 42 zańdy tulǵasy bizdiń bankterden 120 mlrd teńgege jýyq nesıe alǵan. Alaıda, EAEO elderi ishinde nesıe boıynsha málimettermen almasý tártibi sheshilmegen. Osy oraıda, atalǵan qujat bul saladaǵy máselelerdi sheshýge yqpal etedi», - dedi Senat depýtaty.

Budan buryn habarlanǵandaı, byltyr Kelisim Armenııada, Belarýste jáne Qyrǵyzstanda ratıfıkatsııalaý protsesinen ótti.