EAEO elderinde veterenarııalyq preparattardyń biryńǵaı naryǵy qurylady

NUR-SULTAN. QazAqparat – Eýrazııalyq ekonomıkalyq odaqta veterenarııalyq dári-dármek aınalymyn retteý erejeleriniń jobasy EAEO-ǵa múshe elderdiń salalyq quzyrly organ jetekshileriniń qatysýymen ótken jıynda talqylandy. Jıyn Eýrazııalyq ekonomıkalyq komıssııasynyń tehnıkalyq retteý mınıstri Vıktor Nazarenkonyń tóraǵalyǵymen ótti. Kezdesý nátıjesi EAEO aýmaǵynda veterenarııalyq perparattardyń biryńǵaı naryǵyn qurý kerektigin kórsetti, dep habarlaıdy QazAqparat EEK-nyń baspasóz qyzmetine silteme jasap.

Memleketterge daýly suraqtar boıynsha ózara qaıshylyqtardy joıýdyń sáti tústi. Bul degenimiz biryńǵaı ulttandyrý erejeleri jobasy odaq organdarynyń aldaǵy ýaqytta qaraýyna engiziledi degen sóz. Sońǵy sheshimdi EEK keńesi shyǵarady.

«Qazir veterenarııalyq preparattardy tirkeý, osydan 10 jyl burynǵy sheshimge sáıkes, bizdiń odaq elderiniń ulttyq zańnamasyna saı júrgiziledi. Tirkeýdiń mundaı nátıjesi odaqqa múshe basqa da elder arasynda ózara moıyndalady. Bul EAEO-nyń kedendik aýmaǵynda veterenarııalyq preparattardyń aınalymyna quqyq beredi. Degenmen bul erejeni qoldaný barysynda odaqtyń veterenarııalyq preparattar naryǵyna keri áser etetin birneshe problemaly suraqtar anyqtalyp otyr», - dedi Vıktor Nazarenko.

Onyń aıtýynsha, atalǵan sala boıynsha biryńǵaı eýrazııalyq ereje qabyldaý jaǵdaıdy aıtarlyqtaı ózgertedi.

Jıyn nátıjesinde EAEO-nyń quzyrly organ jetekshileri tujyrymdamalyq kelisimderge qol jetkize otyryp, onyń sharttary komıssııa keńesiniń joba týraly sheshimine sáıkes jýyr ýaqytta sarapshylarmen naqtylanyp, kelisiletini aıtyldy.