EAEO elderinde tirkeýde turǵan kólik quraldary Qazaqstanda ýaqytsha 5 jylǵa esepke qoıylady
ASTANA. QazAqparat – Eýrazııalyq ekonomıkalyq odaq elderinde tirkeýde turǵan kólik quraldary Qazaqstanda ýaqytsha 5 jylǵa esepke qoıylady. Bul týraly ІІM Ákimshilik polıtsııa komıtetiniń erekshe tapsyrmalar jónindegi aǵa ınspektory Altynbek Jamalıev aıtty, dep habarlaıdy QazAqparat tilshisi.
«Osy jyldyń 23 qańtarynan bastap elimizge 2022 jyldyń 1 qyrkúıegine deıin ákelingen sheteldik avtomobılderdi zańdastyrýdy júrgizýde. 160 myńǵa jýyq kólik quraly tirkeldi. 22 mamyrdan bastap avtomobıl-konstrýktorlardy tirkeý jalǵasyp jatyr. Kóptegen azamat Reseıden nemese Eýrazııalyq ekonomıkalyq odan elinde esepte turǵan kólikterdi esepten shyǵara almaýyna baılanysty suraqtar qoıyp jatyr. Bul másele de zańdy sheshimin tapty. Jaqyn arada osy kólikterdi tirkeýdi bastaımyz. Atalǵan kólikter ýaqytsha esepke qoıylady», - dedi ol mınıstrliktiń baspasóz qyzmeti alańynda ótken brıfıngte.
Onyń atap ótýinshe, mundaı kólikti esepke qoıý kezinde kólik quralyn tirkeý týraly kýálik jáne Qazaqstan Respýblıkasynyń memlekettik nómirlik belgileri beriletin bolady. Memlekettik nómirlik belgi úshin 9 myń teńgeden, kólik quraly qujaty úshin 4300 teńgeden astam baj bólenedi. Sonymnen qatar 200 000 teńge mólsherinde bastapqy tirkeý úshin alym tóleıdi.
«Ol kólikter 5 jylǵa ǵana ýaqytsha tirkeýge qoıylady. Odan keıin azamattar atalǵan kólikterdi Qazaqstanda tirkeý týraly sheshim qabyldasa, onda kólikti EAEO elderinen esepten sheship, elimizde tirkeıdi. Kólikterdi tirkeý 1 shildeden ary uzartylmaıdy», - dedi Altynbek Jamalıev.
