EAEO elderinde tirkelgen 424 kólik aıyp turaǵyna qoıyldy
«Osy jyldyń qańtarynda Almaty qalasynda ótken Eýrazııalyq úkimetaralyq keńes otyrysy barysynda armıan tarapymen kelissózder ótkizilip, nátıjesinde Armenııa aýmaǵynan Qazaqstan aýmaǵyna avtokólik quraldarynyń ótýi máselesin retteý, onyń ishinde tıisinshe aqparat almas boıynsha ekijaqty konsýltatsııaǵa qatysty birlesken hattamaǵa qol qoıyldy. Armıan tarapymen ýaǵdalastyqqa sáıkes, elimizdiń Іshki ister mınıstrligi Armenııada ýaqytsha turatyn tulǵa retinde tirkelip, 22 441 avtomobıl satyp alǵan Qazaqstan azamattary jaıly aqparat aldy. Qazirgi ýaqytta Armenııanyń quziretti organdardy «jeńildigi bar» avtomobılderdi tek óz elderiniń sheginde ǵana paıdalanýdy qamtamasyz etý jáne olardyń Eýrazııalyq ekonomıkalyq odaqtyń ózge elderine tasymaldanýyna jol bermeý maqsatynda sheteldik azamattardyń atyna avtokólikterdi tirkeýge baqylaý sharalaryn kúsheıtti», - dedi Úkimet basshysy.
Onyń atap ótýinshe, Qazaqstan tarapy Reseımen shekaralas oblystarda sheteldik nómiri bar kólikterdi elimizde júrgizý tártbin túsindirý úshin 13 polıtsııa beketin qurdy. Sonymen qatar osy jylydń qańtarynda Ádilet mınıstrligi aýmaqtyq ádilet organdaryna notarıaldyq palatalarmen birlesip, Armenııa men Qyrǵyzstannan ákelingen avtokólikterge senimhat berý zańdylyǵyn tekserý jóninde komıssııa qurý tapsyryldy.
«Túsindirý jumystaryn qosa alǵanda qabyldanǵan sharalar EAEO týraly shart talaptaryn buza otyryp elge avtokólik ákelý aǵynyn toqtatýǵa múmkindik berdi. Qazirgi ýaqytta ІІM múddeli memlekettik organdarmen birge halyq arasynda sheteldik avtomobılderdi tirkeý qajettigi týraly túsindirý jumystaryn júrgizip jatyr. Osy maqsatta barlyq Arnaýly halyqqa qyzmet kórsetý ortalyqtarynda Osy jyldyń qańtar aıynyń sońynan berý polıtsııa qyzmetkerleri men memlekettik kirister organdarynyń mamandary otyrǵyzyldy. Olar azamattarǵa keńes berip, tirkeý úshin qujattar qabyldaıdy. 1 naýryzǵa deıin AHQKO-lardan shamamen 5,5 myń azamat keńes aldy», - dedi Asqar Mamın.
Premer-Mınıstrdiń aıtýynsha, aqpannyń 8-16 kúnderi aralyǵynda ishki ister organdary sot oryndaýshylarymen birge Jol júrisi erejesin buzǵany úshin tólenbegen aıyppuldardy memleket kirisine óndirip alýǵa baǵyttalǵan «Boryshker» jedel aldyn alý sharasy júrgizilgen. Nátıjesinde 1 160 kólik ıesinen memleket kirisine 337 mln teńge óndirilip alyndy jáne Jol júrisi erejesin buzǵandar ustalyp, kólikteri aıyp turaǵyna qoıyldy. Aıyp turaǵyna qoıylǵan 424 kólik EAEO elderinde tirkelgen.
«Júrgizýshilerge 251 mln teńge aıyppul tóleý týraly 28 447 uıǵarym, onyń ishinde EAEO elderinde tirkelgen kólikterdiń ıelerine 62,8 mln teńgeniń 4 114 uıǵarym berildi. «Bir rettik» aktsııa men túsindirý jumystarynyń júrgizilgendigine qaramastan «ýaqytsha tirkeýden» 114, onyń ishinde armıan nómirli 18 kólik qana ótti «, - Asqar Mamın.
