EAEO elderinde azyq-túlik bir jylda 13% qymbattady – Úkimet basshysy

ALMATY. QazAqparat - 2022 jyly EAEO elderinde azyq-túlik baǵasy orta eseppen 13% ósti. Bul týraly Premer-Mınıstr Álıhan Smaıylov búgin Almatyda ótip jatqan Eýrazııalyq úkimetaralyq keńestiń keńeıtilgen quramdaǵy otyrysynda aıtty, dep habarlaıdy QazAqparat tilshisi.

Qazaqstan Úkimetiniń basshysy BUU sarapshylarynyń baǵalaýy boıynsha 2023 jyly álemdik ekonomıkanyń ósimi 2 paıyzǵa deıin tómendeıtinin atap ótti.

«Mundaı boljam álem elderindegi ınflıatsııalyq kútýlerdiń ósýimen baılanysty. Óndiris pen saýda tizbegindegi irkilis azyq-túlik naryqtarynda baǵanyń ósýine ákeldi. Bul EAEO-ǵa múshe memleketterdiń kórsetkishterine sózsiz áser etedi. Osylaısha, ótken jyly bizdiń elderde azyq-túlik baǵasy orta eseppen 13% artty»,- deıdi Álıhan Smaıylov.

Úkimet basshysy baǵanyń ósýin tejeý, ishki naryqtyń qaýipsizdigin arttyrý jáne halyqqa azyq-túlik ónimderiniń qoljetimdiligin jaqsartý úshin júıeli sharalar qabyldaý qajettigin jetkizdi.

Qazaqstan premeri EAEO elderin azyq-túlik ónimderin óndirý boıynsha birlesken jobalardy qurýǵa jáne qarjylandyrýǵa, jylyjaılardy, mal bordaqylaý alańdaryn, saýda jáne saqtaý ınfraqurylymyn damytýǵa basa nazar aýdarýǵa shaqyrdy.

«Taraptar qoldanatyn sanıtarlyq-fıtosanıtarlyq, veterınarlyq, tehnıkalyq sharalar ózara saýdaǵa jasandy kedergiler jasamaýy kerek. Jumysymyzdyń basty mindeti - bizdiń elderde óndiriletin ónimderdiń ózara saýdasyn keńeıtý ekenin este ustaǵan jón»,- dedi Premer-Mınıstr.