EAEO elderi zańsyz tabyspen kúres salasynda aqparat almasýǵa kelisti

MÁSKEÝ. QazAqparat – Eýrazııalyq ekonomıkalyq odaqqa múshe elderdiń Memleket basshylary qylmystyq jolmen alynǵan tabysty zańdastyrýmen (aqshanyń jylystaýy), sondaı-aq EAEO-nyń kedendik shekarasy arqyly qolma-qol aqsha men qarjy quraldaryn tasyldaý kezinde terrorızmdi qarjylandyrýmen kúres salasynda aqparat almasy týraly Kelisimge qol qoıdy. Bul týraly «QazAqparat» HAA menshikti tilshisi habarlaıdy.

«Memleketter qolma-qol aqsha men aqsha quraldarynyń jyljýy týraly málimetter bazasyna jaýapty bolatyn organdy belgileıdi. Ózge múshe-memlekettiń quzyrly, quqyq qorǵaý jáne kedendik organdarynyń suraýy boıynsha quzyrly organ aqparat usynatyn bolady. Bul – qupııa aqparat bolyp tabylady jáne quzyrly organnyń jazbasha kelisiminsiz ózge maqsattarda paıdalanýǵa jatpaıdy. Onymen qosa, aqparatty alǵan organdar ony qorǵaý boıynsha sharalardy qabyldaýy tıis», - dedi

brıfıng barysynda Eýrazııalyq ekonomıkalyq komıssııa Alqasy tóraǵasynyń kómekshisi Iıa Malkına.

Sondaı-aq I.Malkına málim etkendeı, Joǵary eýrazııalyq ekonomıkalyq keńes munaı salasynda Odaq elderiniń zańnamalaryn úılestirý boıynsha is-sharalar josparyn bekitti.

«Atap aıtqanda, Jol kartasy munaı jáne munaı ónimderin saýdalaýda naryqtyq tetikterdi qamtamasyz etý sheńberinde zańnamalardy úılestirýdi, sonymen qatar bul ónimderdi tasymaldaý qyzmetine qatysty ortaq prıntsıpter men baǵany túzý ádisterin qoldanýdy qarastyrady», - dedi ol.

Onymen bir mezgilde, EAEO Memleketter basshylary Odaq ishinde arnaıy qorǵaý, antıdempıngilik jáne kompensatsııalyq sharalardy qoldaný tetikterin jetildirý máselelerin talqylaǵan.