EAEO elderi qandaı taýarlar ımporttaıtynyna saraptama jasaý kerek - Elbasy

NUR-SULTAN. QazAqparat - Eýrazııalyq ekonomıkalyq odaq elderi qandaı taýarlardy ımporttaıtynyna saraptama jasaý kerek. Bul týraly búgin elordada ótip jatqan Joǵary Eýrazııa ekonomıkalyq keńesiniń keńeıtilgen quramdaǵy otyrysynda QR Tuńǵysh Prezıdenti - Elbasy Nursultan Nazarbaev aıtty, dep habarlaıdy QazAqparat tilshisi.

"Ne ımporttaıtynymyzǵa saraptama jasaýymyz qajet. Jýyqta bul jaıynda oılanyp, qazaqstandyq qurylymdy qaradym. Biz ınflıatsııanyń 50 paıyzyn atalǵan taýarlardy ımporttaýdan alyp otyrmyz. Al barlyǵymyz da ózimizde shyǵatyn taýarlardy ımporttaımyz. Mashına jasaý ónimderin ımporttaımyz, bul jaraıdy. Biraq, halyq tutynatyn shulyq, báteńke, týflı, kostıým jeıde jáne tipti azyq-túlikti qaıta óńdeýdiń jetispeýshiligi saldarynan ımporttap otyrmyz", - dedi Elbasy.

Osy rette QR Tuńǵysh Prezıdenti atalǵan taýarlardyń barlyǵy da EAEO elderinde óndiriletinin basa aıtty.

"Menińshe, komıssııa aıasynda biz saraptama jasaıtyn adamdar tobyn qurýymyz kerek jáne olar súttiń Belarýs pen Reseıde, astyqtyń Qazaqstanda óndiriletinin aıtýy tıis. Tipti áskerı qyzmetshiler úshin kıimdi ımporttap otyrmyz. Bul uıat nárse. Qarańyzdarshy, naryqty keńeıtý úshin, aqsha taýyp, jumys oryndaryn usynýǵa qandaı keńistikter bar. Biz oılanýymyz kerek", - dedi Nursultan Nazarbaev.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sooronbaı Jeenbekov, RF Prezıdenti Vladımır Pýtın, Armenııa Respýblıkasynyń Premer-mınıstri Nıkol Pashınıan, sonymen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysyp otyr.

Jalpy otyrys barysynda Memleket basshylary EAEO damýynyń ózekti máseleleri men bolashaǵyn talqylaıdy. Atap aıtqanda, tsıfrlyq damýdyń, Odaqtyń halyqaralyq qyzmetiniń kún tártibinde turǵan máseleleri, sondaı-aq 2019-2020 jyldarǵa arnalǵan makroekonomıkalyq saıasattyń negizgi baǵdarlary qarastyrylady.

Sammıt sońynda Joǵary Eýrazııa ekonomıkalyq keńesine múshe memleketter basshylarynyń EAEO týraly Kelisimniń 5 jyldyǵyna oraı Birlesken málimdeme jasaýy, sondaı-aq birqatar halyqaralyq qujattarǵa qol qoıýy josparlanǵan.