EAEO elderi ımportty baqylaıtyn Ulttyq qadaǵalaý júıesin qurady

NUR-SULTAN. QazAqparat – Úkimet basshysynyń birinshi orynbasary – Qarjy mınıstri Álıhan Smaıylov Májiliste Eýrazııalyq ekonomıkalyq odaqtyń kedendik aýmaǵyna ákelingen taýarlardy qadaǵalaý tetigi boıynsha kelisimdi ratıfıkatsııalaý týraly zań jobasyn tanystyrdy, dep habarlaıdy QazAqparat tilshisi.

Álıhan Smaıylov aıtyp ótkendeı, kelisimge 2019 jyly 29 mamyrda Nur-Cultandaǵy Joǵarǵy Eýrazııalyq ekonomıkalyq keńes otyrysynda EAEO múshe memleketter basshylary qol qoıǵan.

«Kelisimniń negizgi maqsaty - taýarlar aınalymyn tıimdi baqylaý, zańsyz aınalymdy anyqtaý, salyqtan jaltarý jaǵdaılaryn joıý, bıýdjetke túsetin salyq pen keden tólemderin ulǵaıtý. Kelisimniń erejeleri EAEO kedendik aýmaǵyna ákelingen taýarlardy qadaǵalaý tetigin qurý merzimderi men tártibin reglamentteıdi. Qadaǵalaý ımporttyq taýarlar boıynsha júzege asyrylady. Qadaǵalaýǵa jatatyn taýarlardyń tizbesin EEK keńesi bekitedi», - dedi zań jobasyn tanystyrǵan Álıhan Smaıylov Parlament Májilisiniń jalpy otyrysynda.

Onyń aıtýynsha, qadaǵalaý merzimi bes jyldy quraıdy. Árbir memleket óziniń Ulttyq qadaǵalaý júıesin qurýy qajet. Sondaı-aq, ózderiniń salyq tóleýshileriniń ilespe qujattarynyń osy júıede rásimdelýin baqylaýdy qamtamasyz etýi tıis. Qujattardy mundaı rásimdeýsiz EEAO sheńberinde taýarlardyń tasymaldanýyna tyıym salynady.

«Kelisimde Keden odaǵyna múshe memleketter arasynda qadaǵalaý jónindegi aqparat almasý boıynsha talaptar aıqyndalǵan. Mundaı almasý EEAO ıntegratsııalanǵan aqparattyq platformasy arqyly turaqty túrde júzege asyrylady. Qurmetti depýtattar, taýarlar aınalymyn qadaǵalaý tetigin engizý 2025 jylǵa deıin EEAO tsıfrlyq kún tártibin iske asyrý úshin negizin qalaýshy mindet bolyp tabylady. Kelisimdi ratıfıkatsııalaýdan keıin 12 aı ótken soń barlyq múshe-memleketter pılottyq jobany iske qosady. Pılottyq jobanyń qortyndylary boıynsha qadaǵalaý júıesiniń turaqty jumys isteýine kóshý týraly sheshim qabyldanady», - dedi ol.