EAEO elderi jahandyq tsıfrlyq kún tártibiniń sáýletshileri bola alady – Sadyr Japarov
ASTANA. KAZINFORM – Qyrǵyzstan ulttyq jasandy ıntellekt sheshimderin damytýǵa basymdyq berip otyr. Bul týraly Qyrǵyzstan Prezıdenti Sadyr Japarov Astanada V Eýrazııalyq ekonomıkalyq forýmda aıtty.
Sadyr Japarov óz elinde JI tehnologııalary fıskaldyq júıege, túrli alaıaqtyq áreketterdi anyqtaýǵa, sondaı-aq sybaılas jemqorlyqpen kúreske qatysty engizilgenin atap ótti.
Onyń sózinshe, jasandy ıntellekt memlekettik protsesterdiń ashyqtyǵy men ádildigin qamtamasyz etýdiń tıimdi quraldarynyń birine aınala alady.
– Tsıfrlyq sheshimderdi engize otyryp, biz tsıfrlyq egemendik máselesine tap bolyp otyrmyz. Óz derekterin basqaratyn el – óz bolashaǵyn da basqarady. Al syrtqy ınfraqurylymǵa, algorıtmder men júıelerge táýeldi memleket osal kúıde qalady. Sondyqtan Qyrǵyzstan ulttyq jasandy ıntellekt sheshimderin damytýǵa basymdyq berip otyr, – dedi S. Japarov.
Sonymen birge, Qyrǵyzstan prezıdenti jasandy ıntellektiniń ulttyq shekarasy bolmaıtynyn atap ótti jáne bul turǵyda Eýrazııalyq ekonomıkalyq odaq keńistigi úlken áleýetke ıe.
– Bizdiń elderdi tereń tarıhı ortaqtyq, myqty ǵylymı dástúrler jáne ortaq ekonomıkalyq múddeler biriktiredi. Birlesken modelderdi ázirleý, ortaq esepteý qýattaryn jáne derekter ortalyqtaryn qurý baǵytyndaǵy kúsh-jigerimizdi biriktirsek, biz jaı ǵana paıdalanýshy emes, jahandyq tsıfrlyq kún tártibiniń teń quqyly sáýletshilerine aınala alamyz, – dedi Sadyr Japarov.
Aıta keteıik, búgin elordada Memleket basshysy Qasym-Jomart Toqaevtyń qatysýymen V Eýrazııalyq ekonomıkalyq forýmnyń (EEF-2026) plenarlyq otyrysy ótip jatyr. Forým taqyryby «Jahandyq tsıfrlyq básekedegi EAEO: jasandy ıntellektige basymdyq berý» dep atalady.
Bul jıynǵa Reseı Prezıdenti Vladımır Pýtın, Qyrǵyzstan Prezıdenti Sadyr Japarov, Belarýs Prezıdenti Aleksandr Lýkashenko, Armenııa vıtse-premeri Mger Grıgorıan, Kýba Respýblıkasynyń vıtse-prezıdenti Salvador Valdes Mesa, Vetnam Premer-mınıstriniń orynbasary Ho Kýok Zýng, Mońǵolııa Premer-mınıstriniń orynbasary Nıamtaıshıryn Nomtoıbaıar, Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev jáne taǵy da basqa laýazymdy resmı tulǵalar keldi.
Buǵan deıin Prezıdent Qasym-Jomart Toqaev EAEO-nyń saýda-logıstıka salasyna jasandy ıntellektini belsendirek engizýdi usynǵan edi.
