EAEO elderi sıyr etin óńdeýge arnalǵan ımportqa jeńildikti kvotalar engizdi
ASTANA. KAZINFORM — Eýrazııalyq ekonomıkalyq komıssııa keńesi iri qara mal etiniń jekelegen túrlerin ákelýge tarıftik jeńildikter engizý týraly sheshim qabyldady.
Sheshim bıylǵy 9 naýryzdan bastap kúshine enedi jáne 2026 jylǵy 1 qańtardan bastap týyndaǵan quqyqtyq qatynastarǵa qoldanylady.
Atalǵan sheshim tek et ónimderin óndirýge arnalǵan jańa soıylǵan, salqyndatylǵan jáne muzdatylǵan sıyr etine qatysty. EAEO-ǵa múshe ár memleket úshin tómendetilgen mólsherlememen ákelinetin ettiń shekti kólemi belgilendi.
Jeńildikti kvotalar tómendegideı bólindi:
-
Armenııa — 7,5 myń tonnaǵa deıin;
-
Belarýs — 7,5 myń tonnaǵa deıin;
-
Qazaqstan — 5 myń tonnaǵa deıin (muzdatylǵan et);
-
Qyrǵyzstan — 5 myń tonnaǵa deıin;
-
Reseı — 100 myń tonnaǵa deıin (muzdatylǵan et).
Kedendik bajdyń tómendetilgen mólsherlemesi tek múshe memlekettiń ýákiletti organy bergen rastaý qujaty bolǵan jaǵdaıda ǵana qoldanylady. Qujatta ımporttaýshy uıym, ákelinetin ettiń nomenklatýrasy men kólemi kórsetilýi tıis.
Mundaı shıkizatty tek et ónimderin óndirý úshin ǵana paıdalanýǵa ruqsat etiledi. Ony tek múshe memlekette tirkelgen et óńdeý kásiporyndaryna satýǵa bolady. Mundaı kásiporyndarǵa jatqyzý krıterııleri ulttyq zańnamaǵa sáıkes aıqyndalady.
Etti paıdalanýǵa qatysty shekteýler taýar erkin aınalymǵa shyǵarylǵan kúnnen bastap bir jyldan aspaıdy:
-
eger ımporttaýshy — et óńdeý kásiporny bolsa, taýar onyń qoımasyna túskenge deıin;
-
eger ımporttaýshy ózge tulǵa bolsa, qaıta óńdeýshige satylǵanǵa deıin.
Taýardyń qoımaǵa túsýi nemese satylýy qabyldaý ne qabyldap-berý aktisimen rastalady.
Sonymen qatar, Armenııa, Belarýs, Qazaqstan, Qyrǵyzstan jáne Reseı úkimetteri jeńildikpen ákelingen shıkizattan óndirilgen daıyn ónimniń EAEO-nyń basqa memleketterine eksporttalmaýyn qamtamasyz etýi tıis.
Jeńildik 2026 jylǵy 1 qańtardan 31 jeltoqsanǵa deıin tirkelgen deklaratsııalar boıynsha ákelinetin taýarlarǵa qoldanylady.
Aıta keteıik, bıyl Qazaqstannan et satyp alatyn elder sany artady.