EAEO elderi kontrafaktilik kontentke qarsy birlesken sharalar ázirlep jatyr
ASTANA. KAZINFORM – EAEO elderi ınternettegi zııatkerlik menshik quqyqtaryn buzýǵa qarsy kelisim jobasyn ázirlep jatyr.
Eýrazııalyq ekonomıkalyq odaqqa múshe memleketter aqparattyq-telekommýnıkatsııalyq «Internet» jelisinde zııatkerlik menshik obektilerine qatysty quqyqbuzýshylyqtarǵa qarsy kúreste ortaq tásilder qalyptastyrý týraly ýaǵdalasty. Atalǵan tásilderdi aldaǵy aılarda maquldanýy kútilip otyrǵan Kelisim jobasynda bekitý josparlanyp otyr.
Kelisim tsıfrlyq ortada fılmder, mýzyka, kitaptar jáne avtorlyq quqyqtyń ózge de obektilerin zańsyz paıdalanýǵa qarsy is-qımyl normalaryn qamtıdy. Sondaı-aq qujatta kontrafaktilik kontent zańsyz ornalastyrylǵan saıttar men onlaın-resýrstarǵa qoljetimdilikti shekteý máseleleri boıynsha EAEO-ǵa múshe memleketterdiń úılestirilgen ustanymdaryn qalyptastyrý kózdelgen.
Kelisimniń basty maqsaty – quqyq ıeleriniń múddelerin qorǵaý tetikteriniń tıimdiligin arttyrý jáne EAEO elderi arasyndaǵy ózara is-qımyldyń biryńǵaı mehanızmderin ázirleý.
Atap aıtqanda, quqyq buzý bolǵan kezde EAEO-ǵa múshe memlekettiń sot sheshimi negizinde ınternet-resýrstardy buǵattaý múmkindigin qarastyrý josparlanyp otyr. Bul rette saıt ıeleri, aqparattyq deldaldar jáne tsıfrlyq ortadaǵy ózge de qatysýshylar mundaı kontentke qoljetimdilikti shekteý boıynsha tıisti sharalar qabyldaýǵa mindetti bolady.
Sonymen qatar EAEO elderinde zııatkerlik menshik quqyqtarynyń buzylýyna baılanysty qoljetimdiligi shektelgen ınternet-resýrstardyń ulttyq elektrondyq tizilimderin qurý kózdelýde. Bul tizilimder buǵattalǵan resýrstardy esepke alý jáne ýákiletti organdar arasynda aqparat almasý úshin paıdalanylatyn bolady.
Mundaı tizilimderdi engizý qabyldanatyn sharalardyń ashyqtyǵyn arttyryp, zańsyz kontentti buǵattaýda biryńǵaı ustanymdy qamtamasyz etýge, sondaı-aq tsıfrlyq keńistikte zııatkerlik quqyqtardy qorǵaý salasyndaǵy is-qımyldy úılestirýdi kúsheıtýge múmkindik beredi dep kútilýde.
Kelisimdi iske asyrý ınternettegi kontrafaktilik kontenttiń taralýyn qysqartýǵa, tsıfrlyq naryq qatysýshylary úshin túsinikti ári boljamdy jaǵdaı qalyptastyrýǵa, sondaı-aq EAEO sheńberinde adal básekelestiktiń damýyna yqpal etpek.
Aıta ketelik Qazaqstannyń EAEO-ǵa tóraǵalyǵynyń negizgi basymdyqtary atalǵan edi.