EAEO elderi fermerlerdi qarjylaı qoldaý tetigin iske qosady
ASTANA. KAZINFORM — Qazir komıssııa taraptarmen birlesip, EAEO-nyń normatıvtik quqyqtyq bazasyna ózgerister engizý jónindegi jumysty bastady, dep habarlaıdy Saýda jáne ıntegratsııa mınıstrliginiń baspasóz qyzmeti.
2025 jylǵy 31 qańtarda EAEO-ǵa múshe memleketterdiń úkimet basshylary Eýrazııalyq ekonomıkalyq komıssııaǵa taraptardyń sarapshylarymen birlesip agroónerkásiptik sektorǵa jáne onyń ınfraqurylymyna birlesken kooperatsııalyq jobalardy qarjylyq qoldaý tetigin keńeıtý máselesin pysyqtaýdy tapsyrdy.
Ekonomıkanyń naqty sektorynda kooperatsııany damytý maqsatynda 2024 jyly EAEO sheńberinde ónerkásip salasyndaǵy birlesken kooperatsııalyq jobalarǵa qarjylyq járdemdesý tetigi qoldanysqa engizilgenin atap ótý qajet.
Bul tetik EAEO bıýdjeti esebinen qarjy uıymdary beretin kredıtter men qaryzdardyń paıyzdyq mólsherlemesin sýbsıdııalaýdy kózdeıdi.
Aıta keteıik, EAEO elderi memleketteri men úkimetteriniń basshylary agroónerkásiptik keshenge qarjylaı járdemdesý tetigin taratý qajettigin birneshe ret atap ótken edi.
Osylaısha, EAEO elderiniń aýyl sharýashylyǵy salasynyń qazirgi jaı-kúıin taldaý negizinde jáne Qazaqstan ekonomıkasy úshin agrarlyq azyq-túlik sektorynyń mańyzdylyǵyn eskere otyryp, kelesi basym baǵyttar aıqyndaldy:
— aýyl sharýashylyǵy ósimdikteriniń selektsııasy men tuqym sharýashylyǵyn damytý;
— mal sharýashylyǵynyń turaqty damýy;
— aýyl sharýashylyǵy ónimderin qaıta óńdeý;
— AÓK ınfraqurylymyn damytý.
— Búgingi tańda komıssııa taraptarmen birlesip, qarjylyq járdemdesý tetiginiń negizgi sharttaryn jáne agroónerkásiptik keshenniń kooperatsııalyq jobalaryn irikteý krıterııin aıqyndaýǵa tıis erejeniń tıisti jobasyn ázirleýdi qosa alǵanda, EAEO-nyń normatıvtik quqyqtyq bazasyna ózgerister engizý jónindegi jumysty bastady. Atqarylǵan jumystyń nátıjeleri bıylǵy jyldyń ekinshi jartyjyldyǵynda josparlanǵan Eýrazııalyq úkimetaralyq keńestiń kezekti otyrysynda EAEO-ǵa múshe memleketterdiń úkimet basshylaryna usynylatyn bolady. Tutastaı alǵanda, qazaqstandyq fermerler úshin agroónerkásiptik keshende qarjylyq qoldaý tetikterin qoldaný EAEO elderiniń bıznesimen birlesip kooperatsııada óz tehnologııalaryn damytýǵa, jetkizýdiń jáne resýrstyq qamtamasyz etýdiń tıimdi tizbekterin qurýǵa múmkindik beredi, — dep atap ótti mınıstrlik.
Budan buryn EAEO elderi arasynda eń arzan kúnbaǵys maıy Qazaqstanda ekeni anyqtaldy.