EAEO elderi arasynda Qyrǵyzstan ǵana birinshi toqsandy profıtsıtpen aıaqtady
ASTANA. KAZINFORM — Eýrazııa ekonomıkalyq komıssııasy 2024 jyldyń І toqsanyndaǵy EAEO elderiniń bıýdjeti týraly derekterdi jarııa etti.
Sonymen, Qazaqstanda bıýdjet tapshylyǵy 24,2 paıyzǵa artsa, al Reseıde birden 85,8 paıyzǵa ulǵaıyp otyr.
Qazaqstan: 2024 jyldyń І toqsanyndaǵy bıýdjet kirisi — 9,5 mlrd dollar, shyǵysy — 11,8 mlrd dollar. 2,8 mlrd dollar bıýdjet tapshylyǵy baıqalady. Salystyrmaly túrde aıtar bolsaq, 2023 jyldyń 3 aıynda Qazaqstan bıýdjeti 9,6 mlrd dollardy, al shyǵystary 11,8 mlrd dollardy quraǵan edi. Tapshylyq shamamen 1,9 mlrd dollar bolǵan.
Reseı: 2024 jyldyń І toqsanyndaǵy bıýdjet kirisi — 78,1 mlrd dollar, shyǵysy — 106,8 mlrd dollar. Tapshylyq — 28,7 mlrd dollar.
Qyrǵyzstan: 2024 jyldyń І toqsanyndaǵy bıýdjet kirisi — 900 mln dollar, shyǵysy — 800 mln dollar. Bıýdjet profıtsıti — 100 mln dollar. 2023 jyldyń І toqsanynda Qyrǵyzstan bıýdjeti 800 mln dollar, shyǵysy da dál osyndaı soma bolǵan edi.
Armenııa: 2024 jyldyń І toqsanyndaǵy bıýdjet kirisi — 1,3 mlnd dollar, shyǵysy 1,3 mlrd dollar. Ótken jyldyń 3 aıynda armıan bıýdjeti 1,2 mlrd dollarǵa jetip, shyǵysy 1,1 mlrd dollardy qurady. Profıtsıt shamamen 200 mln dollar bolǵan edi.
Eýrazııa ekonomıkalyq komıssııasynyń atap ótýinshe, 2024 jylyń І-toqsanynda respýblıkalyq bıýdjetterdiń kirisi qurylymynda qosylǵan qun salyǵy (27-den 47 paıyzǵa deıin) jáne ózge de túsimder basym úleske ıe.
Bul rette Armenııada tabys salyǵynyń, al Qyrǵyzstanda qosylǵan qun salyǵynyń artqany baıqalady.
Al bıýdjettik shyǵysyna keler bolsaq, onda Armenııa, Qazaqstan jáne Qyrǵyzstanda áleýmettik sala men jalpy memlekettik qyzmetti qarjylandyrý aıtarlyqtaı joǵary úleske ıe bolyp otyr.
Bul rette ótken jyldyń 3 aıymen salystyrar bolsaq, onda bıýdjet shyǵysynyń jalpy kólemindegi búkil memlekettik qyzmet shyǵystarynyń úlesi artyp, áleýmettik salany qarjylandyrý tómendegen.
