EAEO eksporttalatyn taýarlardyń shyǵý tegin anyqtaýdyń biryńǵaı erejesin bekitti
ASTANA. KAZINFORM — Eýrazııalyq ekonomıkalyq komıssııa (EEK) Keńesi eksporttalatyn taýarlardyń shyǵýy men elektrotehnıkalyq ónimderdi tańbalaý boıynsha sheshimder qabyldady, dep habarlaıdy Úkimettiń baspasóz qyzmeti.
EEK Keńesiniń kezekti otyrysy onlaın formatta ótti. Jıynda EAEO-nyń basqa eldermen saýda baılanysyn damytý, tehnıkalyq retteý, taýarlardyń shyǵý tegin anyqtaý jáne óndirýshilerdiń memlekettik satyp alýlarǵa qatysý múmkindikterin keńeıtý máseleleri qaraldy. Qazaqstan delegatsııasyn Premer-mınıstrdiń orynbasary — ulttyq ekonomıka mınıstri Serik Jumanǵarın basqardy.
Otyrysta qabyldanǵan mańyzdy sheshimderdiń biri — EAEO aýmaǵynan tys elderge eksporttalatyn jáne arnaıy retteý sharalary qoldanylatyn taýarlardyń qaı elde óndirilgenin anyqtaýdyń biryńǵaı erejelerin bekitý boldy. Jańa erejeler EAEO-ǵa múshe bes memleketke ortaq bolmaq. Onda taýardyń óndirilgen elin anyqtaý, ony qujatpen rastaý jáne keden organdarynyń ózara aqparat almasý tártibi belgilengen.
— Bul ózgerister eksporttalatyn taýarlardyń shyǵý tegin baqylaýdy jeńildetýge, bir elde engizilgen shekteýlerdi EAEO-nyń basqa memleketteri arqyly aınalyp ótýge jol bermeýge jáne otandyq óndirýshilerdiń múddelerin qorǵaýǵa múmkindik beredi. Taýardyń shyqqan elin rastaý úshin arnaıy sertıfıkattar qoldanylady. Mundaı qujattardy turaqty túrde shyǵarylatyn ónimderge de rásimdeýge bolady. Sonymen qatar, sertıfıkattardy elektrondy túrde rastaý jáne tekserý múmkindigi qarastyrylǵan, — delingen habarlamada.
Otyrysta elektrotehnıkalyq ónimderdiń, jaryqtandyrý jabdyqtary men baspa shemalarynyń jekelegen túrlerin tańbalaý jóninde de kelisimge qol jetkizildi. Olardyń qatarynda elektr toǵyn túzetkishter, tasymaldy elektr shamdary, qyzdyrý shamdary, jaryqtandyrý qurylǵylary jáne basqa da ónimder bar. Alaıda bul barlyq elde tańbalaý birden engiziledi degendi bildirmeıdi. EAEO-ǵa múshe ár memleket tańbalaýdy engizý qajettiligin, merzimi men tártibin ózi sheshedi. Ol úshin aldymen kásipkerlermen talqylaý júrgizilip, qajetti ınfraqurylymnyń daıyndyǵy baǵalanady.
Sonymen qatar, otyrysta EAEO-nyń basqa eldermen saýda baılanysyn keńeıtý máseleleri qaraldy. Atap aıtqanda, Iordanııa, Pákistan jáne Týnıspen yntymaqtastyqty damytý, sondaı-aq Birikken Arab Ámirlikteri men Indonezııamen jasalǵan saýda kelisimderin júzege asyrý máseleleri talqylandy. Budan bólek, Serbııamen qoldanystaǵy erkin saýda týraly kelisimge taýarlardy jetkizý sharttaryn rastaýǵa qatysty ózgerister engizý máselesi qaraldy.
Osydan buryn Quryltaı Zań qabyldap, otandyq kásipkerlerge EAEO-nyń memlekettik satyp alý naryǵyna jol ashylǵanyn jazǵan edik.
