EAEO-da otandyq dári-dármek óndirýshilerdiń ónimderin qoldaý kerek - Jandos Búrkitbaev
ASTANA. KAZINFORM – Eýrazııalyq ekonomıkalyq odaq elderinde otandyq dári-dármek óndirýshilerdiń ónimderin qoldaý kerek Bul týraly Úkimet otyrysynda Densaýlyq saqtaý vıtse-mınıstri Jandos Búrkitbaev aıtty.
«Óńirlerdegi medıtsınalyq uıymdardyń memlekettik satyp alý protsessin tsıfrlandyrsaq, 2025 jyly otandyq óndiristiń úlesin kóbeıtýge múmkindik beredi. Sondyqtan kelesi shuǵyl sharalardy qabyldasaq, otandyq óndiristiń jedel damýyna múmkindik bolady», - dedi vıtse-mınıstr.
Osy oraıda ol birinshi shara retinde Qarjy mınıstrliginiń «Elektrondyq qarjy ortalyǵy» tsıfrlyq formatta dári-dármekti satyp alý protsessterin tsıfrlandyrý jumysyn jyldamdatý kerektigin aıtty. Ekinshiden, medıtsınalyq uıymdardyń otandyq dári-dármekterdi satyp alý úlesin kóbeıtý úshin óńirlerdiń damý josparynda ákimdikterge satyp alý boıynsha ındıkatordy bekitý qajet. Úshinshiden, dári-dármekterdiń ulttyq tirkeý qujattamalaryn EAEO qujattaryna sáıkes keltirý jáne osy elderde otandyq dári-dármek óndirýshilerdiń ónimderin qoldaý kerek.
«Farmatsevtıkalyq ónerkásipti damytý jónindegi strategııany odan ary qalyptastyrý úshin jáne Memleket basshysynyń tapsyrmasyn oryndaý maqsatynda tıisti memlekettik organdardyń, bıznestiń jáne qaýymdastyqtardyń qatysýymen vedomstvoaralyq komıssııa quryldy jáne tıisti jumystar júrgizilýde. Mınıstrlik otandyq farmatsevtıkalyq ónerkásipti damytý baǵytynda jumysty jalǵastyrady», - dedi Jandos Búrkitbaev.
