EAEO-da biryńǵaı tsıfrlyq ónerkásiptik keńistik qurylady

ASTANA. QazAqparat - Eýrazııalyq ekonomıkalyq odaqta biryńǵaı tsıfrlyq ónerkásiptik keńistik qurylady. Bul týraly Qazaqstan mashına jasaýshylarynyń VI Forýmynda Eýrazııalyq ekonomıkalyq komıssııasynyń ónerkásip jáne agroónerkásip mınıstri Aleksandr Sýbbotın málim etti, dep habarlaıdy QazAqparat.

«EAEO elderi úkimet basshylary sheshimine sáıkes, múshe memleketterdiń ónerkásibinde tsıfrlyq transformatsııa jáne biryńǵaı tsıfrlyq ónerkásiptik keńestikti qalyptastyrý úshin jaǵdaı jasaý boıynsha tujyrymdamany daıarlap jatyrmyz. 2019 jyldan bastap ony tikeleı júzege asyrýǵa kirisýge tıistimiz. Qazirdiń ózinde bizdiń elderde EAEO aıasynda ónerkásiptiń aqparattyq júıesin qurýǵa suranys qalyptasty» , - dedi A. Sýbbotın.

Onyń sózine qaraǵanda, júıe barlyq óndiristik ári ǵylymı uıymdardy baılanystyrýy kerek.

«2017 jyly ónerkásiptik kooperatsııa men sýbkontraktsııanyń eýrazııalyq jelisin qurýǵa qadam jasaldy. Qazirgi kezde ónerkásipke taldaý jasaý, sýbsıdııa monıtorıngi, eýrazııalyq jobalarǵa aqparattyq qoldaý salasynda birqatar qosalqy júıelerdi ázirleýdemiz. Olar EAEO ónerkásibi aqparattyq júıesiniń bir bóligi bolady», - dedi mınıstr.

Budan buryn habarlanǵandaı, Astanadaǵy EXPO Kongress-ortalyǵynda Qazaqstan mashına jasaýshylarynyń VI Forýmy ótip jatyr.

Shara barysynda sóılegen Jeńis Qasymbektiń sózine qaraǵanda, 2018 jyldyń 8 aıynyń qorytyndysy boıynsha satylǵan árbir ekinshi avtomobıl otandyq óndiriske tıesili.

Sonymen qatar, Qazaqstan Úkimeti elimizde eksportyn arttyratyn mashına jasaý kásiporyndaryna memlekettik qoldaýdy usyndy.