EAEO bazasynda Strategııalyq bastamalar jónindegi agenttik qurý orynsyz - Álibek Qýantyrov
Ekonomıka mınıstrlikteriniń basshylary EAEO-da strategııalyq josparlaý júıesin, 2035 jylǵa deıingi ekonomıkalyq damýdyń negizgi baǵyttaryn, sondaı-aq qýyp jetýshi ekonomıkalardy damytý úshin negizdelgen nysanaly qarjylandyrý tetikteri men baǵdarlamalaryn ázirleýdiń nysanalyǵyn talqylady, dep habarlaıdy QazAqparat QR Ulttyq ekonomıka mınıstrliginiń baspasóz qyzmetine silteme jasap.
Mınıstr aǵymdaǵy kún tártibinde kóteriletin Strategııalyq josparlaý máselesi tek qana ulttyq quzyretke jatatynyn atap ótti. Osy turǵyda EAEO sheńberinde jumys istep turǵan alańdar men ózara is-qımyl formattaryn paıdalaný qajet.
«Biz EAEO bazasynda konsortsıým nysany retinde de Strategııalyq bastamalar jónindegi agenttikti qurý orynsyz dep sanaımyz», - dep atap ótti Á.Qýantyrov.
Keńes otyrysy barysynda UEM basshysy Strategııa-2025 tıimdi iske asyrý úshin jumys istep turǵan damý ınstıtýttary men qarjylandyrý tetikteriniń resýrstaryn paıdalaný oryndy ekenin túsindirdi. Sondaı-aq, mınıstr olardyń tıimdiligin arttyrý qajettiligin atap ótti.
«Yntymaqtastyqty qabyldanǵan strategııalyq baǵyttar sheńberinde qurý oryndy. Bul baǵyttarda EADB, ETDQ áleýetin, sonymen qatar «Astana» halyqaralyq qarjy ortalyǵynyń áleýetin paıdalaný arqyly birlesken jobalardy qarjylandyrý týraly naqty aıtylǵan», - dedi mınıstr.
2035 jylǵa deıingi ekonomıkalyq damýdyń negizgi baǵyttaryn daıyndaý boıynsha Á.Qýantyrov búgingi tańda qujat jobasy memleketishilik kelisýde ekenin atap ótti.
«Ázirlenip jatqan «EAEO-nyń 2035 jylǵa deıingi ekonomıkalyq damýdyń negizgi baǵyttary» jobasynda EAEO týraly shart sheńberinen shyqpaıtyn ekonomıkalyq yntymaqtastyqtyń negiz qalaýshy qaǵıdattaryn saqtaý mańyzdy. Bul turǵyda biz sandyq ólshemdi jaqtamaımyz, biraq odaq aıasynda qabyldanatyn qujattardyń sapasyn qadaǵalaımyz», - dep qosty ol.
Mınıstr sondaı-aq osy joba mazmunyn tolyqtyrý boıynsha talqylaýlarǵa jáne odan ári birlesken jumysqa qatysýǵa daıyndyǵyn bildirdi.
Qorytyndylaı kele, vedomstvo basshysy Ulttyq ekonomıka mınıstrligi atynan qazaqstandyq tarap ashyq jáne syndarly yntymaqtastyqqa daıyn ekenin atap ótti.
Ekonomıka mınıstrlikteri basshylarynyń keńesine Armenııa Respýblıkasy Ekonomıka mınıstri Vagan Kerobıan, Belarýs Respýblıkasy Ekonomıka mınıstriniń orynbasary Alesıa Abramenko, Qyrǵyz Respýblıkasy Ekonomıka jáne kommertsııa mınıstri Danııar Amangeldıev, Reseı Federatsııasy Ekonomıkalyq damý mınıstriniń orynbasary Dmıtrıı Volvach, sondaı-aq EEK Integratsııa jáne makroekonomıka jónindegi alqa múshesi (mınıstr) Sergeı Glazev pen ónerkásip pen agroónerkásiptik saıasat jónindegi alqa múshesi (mınıstr) Artak Kamalıan qatysty.
EAEO-ǵa múshe memleketterdiń ekonomıka mınıstrlikteri basshylarynyń EEK ókilderiniń qatysýymen keńesteri odaqtyń ekonomıkalyq kún tártibiniń ózekti máselelerin talqylaý maqsatynda 2019 jyldan beri ótkizilip keledi.
Foto: t.me/presseconomy
