EAEO aıasynda gazdyń ortaq naryǵy qandaı bolmaq

NUR-SULTAN. QazAqparat – Eýrazııalyq ekonomıkalyq komıssııanyń energetıka jáne ınfraqurylym jónindegi múshesi (mınıstri) Emıl Kaıkıev Eýrazııalyq ekonomıkalyq odaq aıasynda gazdyń ortaq naryǵyna qatysty oıymen bólisti, dep habarlaıdy QazAqparat tilshisi.

«Qazirgi ýaqytta naqty qunyn ataý múmkin emes. Búginde bizde gazdyń ortaq naryǵyn qalyptastyrý jónindegi baǵdarlama bar. Oǵan sáıkes, gaz jetkizý jónindegi ekijaqty halyqaralyq kelisimsharttardan bólek kelisimsharttardy júzege asyrý naryqtyq baǵa boıynsha jasalýy tıis», - dedi ol Ortalyq kommýnıkatsııalar qyzmetiniń kóshpeli baspasóz máslıhaty barysynda.

Máselen, onyń túsindirýinshe, gaz jetkizý týraly eki memleket kelisimshart jasaıdy. Dál osy qujat halyqaralyq kelisimshart dep atalady. Soǵan sáıkes, sharýashylyq júrgizýshi sýbekt kelisimshartty júzege asyrý úshin sharýashylyq júrgizýshi sýbektiler arasynda shart jasasady.

«Bizde halyqaralyq kelisimshartty júzege asyrý maqsatynda sharýashylyq júrgizýshi sýbektiler arasynda tikeleı shart, bırjalyq shart (bırjalyq mámile boıynsha) jáne ekijaqty shart jasasýǵa bolady. Ázirshe, gazdy tasymaldaýǵa arnalǵan tarıfti daıyndaý tetikteri joq. Qazirgi ýaqytta gazdyń ortaq naryǵy týraly halyqaralyq kelisimshart daıyndalyp jatyr jáne atalǵan kelisimshart aıasynda gazǵa arnalǵan tranzıttik kólik tarıfiniń ustanymdary bekitiledi. Bul kelisimshartqa qol qoıý 2022 jylǵa qarastyrylǵan. Al qazirgi ýaqytta ol daıyndalý ústinde. Ol 2025 jyldyń 1 qańtarynan buryn kúshine enbeıdi. Mine sol kezde ǵana gaz tasymalynyń baǵasyn qalyptastyrý jóninde belgili bir ustanymdar jaıynda sóz qozǵaýǵa bolady», - dedi Emıl Kaıkıev.