EAEO aıasynda azamattyǵyna qaramastan múshe elderde jumysqa ornalasa alady

NUR-SULTAN. QazAqparat – Eýrazııalyq ekonomıkalyq odaq (EAEO) aýmaǵyndaǵy jumys berýshiler azamattyǵyna qaramastan, múshe elderden maman izdestire alady. Bul týraly Saýda jáne ıntegratsııa vıtse-mınıstri Janel Kýshýkova aıtyp berdi, dep habarlaıdy QazAqparat.

Ótken jyldyń aıaǵynda Eýrazııalyq ekonomıkalyq ıntegratsııany damytýdyń 2025 jylǵa deıingi strategııalyq baǵyttaryn iske asyrý jónindegi is-sharalar jospary qabyldanǵan.

«Jospar 523 is-sharany qamtıdy jáne EAEO organdarynyń 50 halyqaralyq sharty men 220 aktisin ázirleýdi kózdeıdi. Barlyq sharalar kedergilerdi joıýǵa, erkin naryqty qalyptastyrý jolyndaǵy bıýrokratııalyq jáne ákimshilik kedergilerden bosatýǵa baǵyttalǵan. Bul tek taýarlarǵa ǵana emes, eńbek kúshiniń qozǵalysyna da qatysty bolady», - dedi J. Kýshýkova Ortalyq kommýnıkatsııalar qyzmetinde ótken baspasóz máslıhatynda.

Al búgin Eýrazııalyq ekonomıkalyq komıssııa keńesinde bıylǵy 1 shildeden bastap «Shekarasyz jumys» aqparattyq resýrsynyń iske qosylýy týraly sheshimge qol qoıylady.

«Bul kádimgi eńbek bırjasy, biraq shekara bolmaıdy. Osy resýrs arqyly EAEO aýmaǵyndaǵy jumys berýshiler azamattyǵyna qaramastan, jumyskerlerdi izdestire alady», - dep túsindirdi spıker.

Sonymen birge, vıtse-mınıstr «Koronavırýs pandemııasyna baılanysty EAEO aýmaǵynda jumysqa turý talaptary ózgerdi me?» degen suraqqa jaýap berdi.

«Dál koronavırýs pandemııasyna baılanysty jumysqa turý máselelerin retteıtin zańnamamyz ózgertilgen joq. Qazir memleketter aýmaǵyna kirip-shyǵý erejeleri ózgerdi, KVI teris nátıjesi bar PTR anyqtamasy suralady. Bizdiń Qazaqstanda da jumysqa ornalasý úshin ázirge vaktsınalaý pasporty talap etilmeıdi, EAEO ózge elderinde de jaǵdaı osyndaı. PTR anyqtamasynan basqa esh ózgeris joq dep aıtýǵa bolady», - dep túsindirdi J. Kýshýkova.