EAEO aıasynda asyl tuqymdy mal sharýashylyǵy naryǵyn damytý tártibi aıqyndaldy

NUR-SULTAN. QazAqparat – Parlament Májilisiniń jalpy otyrysynda «Eýrazııalyq ekonomıkalyq odaq sheńberinde aýyl sharýashylyǵy janýarlarymen selektsııalyq-asyl tuqymdyq jumys júrgizýdi birizdendirýge baǵyttalǵan sharalar týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Kelisim múshe memleketterde aýyl sharýashylyǵy janýarlarymen selektsııalyq-asyl tuqymdyq jumys júrgizý tártibin retteıdi jáne EAEO aıasynda asyl tuqymdy mal sharýashylyǵy naryǵyn damytýǵa, sondaı-aq ózara saýdada kedergilerdi joıýǵa baǵyttalǵan. Kelisimdi ázirleý jumysy 2014 jyldan bastap Eýrazııalyq ekonomıkalyq komıssııanyń jumysy aýqymynda júrgizilgenin, jumys tobynyń eskertýlerin eskere otyryp, pysyqtalǵanyn atap ótken jón. Kelisim asyl tuqymdy mal sharýashylyǵy jáne agroónerkásiptik keshen salasyndaǵy ulttyq zańnamanyń maqsattary men mindetterine sáıkes keledi», - dedi QR Aýyl sharýashylyǵy mınıstri Saparhan Omarov.

Kelisimniń uǵymdyq apparatynda «asyl tuqymdyq ónim», «asyl tuqymdyq qundylyq», «asyl tuqymdyq janýar», «selektsııalyq jáne asyl tuqymdyq jumys», «aýyl sharýashylyǵy janýary» sııaqty termınder birizdendirilgen ári naqtylanǵan.

Selektsııalyq-asyl tuqymdyq jumys júrgizý kezinde múshe memleketterde asyl tuqymdyq ónim óndirý salasyndaǵy biryńǵaı talaptardy qoldaný maqsatynda Kelisimde mynalardy birizdendirý kózdeledi:

- aýyl sharýashylyǵy janýarlarynyń jańadan qurylǵan tuqymdaryn, jelilerin nemese krostaryn baıqaýdan ótkizý tártibi;

- asyl tuqymdy materıaldyń sapasyn molekýlıarlyq genetıkalyq saraptama júrgizý arqyly aıqyndaý tártibi;

- týys tuqymdardy paıdalaný arqyly alynǵan asyl tuqymdy janýardyń tuqymyn aıqyndaý tártibi;

- janýarlardyń asyl tuqymdyq qundylyǵyn baǵalaý boıynsha ádistemeleri.

«Selektsııalyq-asyl tuqymdyq jumysty úılestirýdi múshe memleketterdiń ýákiletti organdary júzege asyrady, taldamalyq qamtamasyz etý ǵylymı-zertteý uıymdaryna bekitiletin bolady.

Sondaı-aq Kelisimde Eýrazııalyq ekonomıkalyq odaqqa múshe memleketter asyl tuqymdy mal jáne selektsııalyq jetistikter týraly málimetter almasýdy kózdeıdi. Qazirgi ýaqytta Eýrazııalyq ekonomıkalyq komıssııamen birlesip Kelisimdi iske asyrý úshin normatıvtik qujattardy ázirleý boıynsha jumystar júrgizildi.

Kelisimdi ratıfıkatsııalaý EAEO aýqymynda selektsııalyq-asyldandyrý jumystaryn júrgizýdi ońtaılandyrýǵa, mal sharýashylyǵynda selektsııa men asyl tuqymdy isti damytýdy qamtamasyz etýge, otandyq asyl tuqymdy ónimniń básekege qabilettiligin arttyrýǵa múmkindik beredi», - dedi mınıstr.