EAEO aýmaǵyna basqa elderden kirgen kólikter nege Qazaqstannan shyǵarylyp jatyr

NUR-SULTAN. QazAqparat – QR Qarjy mınıstrligi Memlekettik kirister komıtetiniń Saýdalyq emes aınalymdar basqarmasynyń bas sarapshysy Nurlan Namysov EAEO aýmaǵyna basqa elderden kirgen kólikter nege Qazaqstannan shyǵarylyp jatqanyn túsindirdi, dep habarlaıdy QazAqparat tilshisi.

Basqarma sarapshysynyń aıtýynsha, EAEO aýmaǵyna úshinshi elderden kirgen kólikterdi shyǵarý merzimi pandemııaǵa baılanysty keıinge shegerilgen. Sol shegerilgen merzim aıaqtalýyna baılanysty, elimizde atalmysh kólikterge qatysty ákimshilik sharalar qolǵa alynyp jatyr.

«Pandemııaǵa baılanysty 2020 jyly Eýrazııalyq ekonomıkalyq komıssııanyń sheshimi shyqty. Ol sheshim boıynsha Eýrazııalyq ekonomıkalyq odaq elderiniń aýmaǵyna úshinshi elderden (EAEO-ǵa múshe emes elder - red.) 2021 jylǵa deıin kirgen avtokólikterdiń júrý ýaqyty bıylǵy 30 qyrkúıekke deıin uzartylǵan bolatyn. 30 qyrkúıekten keıin olar el aýmaǵynan shyǵýǵa mindettelgen. Osy merzim bitse de, el aýmaǵynan shyǵarylmaǵan kólikterge tıisti ákimshilik sharalar júrgizýdi bastadyq. Atap ótsek, Eýrazııalyq ekonomıkalyq kodekstiń 268-babynyń 2-tarmaǵynyń 5-tarmaqshasy boıynsha syrtqa shyǵarýǵa 6 aı beriledi. Sol merzim ishinde shyǵarylmasa Qazaqstan zańnamasy boıynsha ustalyp, barlyq alym-salyqtaryn tóletip, kedendik tazartýdan ótýge mindetteledi», - dedi Nurlan Namysov.