EAEO aýmaǵy arqyly qazaqstandyq taýarlardyń eksportyna shekteý bar - Ábdirov

NUR-SULTAN. QazAqparat – Eýrazııalyq ekonomıkalyq odaq elderiniń aýmaǵy arqyly qazaqstandyq taýarlardyń eksporty men tranzıtine shekteý bar. Bul týraly QR Parlamenti Senaty tóraǵasynyń orynbasary Nurlan Ábdirov aıtty, dep habarlaıdy QazAqparat tilshisi.

«Basqa elderde, onyń ishinde EAEO elderinde bizdiń sertıfıkattar moıyndalmaı, otandyq naryqta tehnıkalyq retteýmen baılanysty problemalar oryn alyp, «kúmándi« sertıfıkattardyń úlesi basym bolyp tur. EAEO elderiniń aýmaǵy arqyly qazaqstandyq taýarlardyń eksporty men tranzıtine shekteý de bar», - dedi ol Senatta ótip jatqan Úkimet saǵatynda.

Onyń atap ótýinshe, júkterdi ákelý men áketýdi shekteýde Qytaı Halyq Respýblıkasymen de júıeli problemalar bar. Qazaqstandyq kásipkerler áli kúnge deıin sheshimin tappaǵan bul máseleni birneshe ret kóterdi. Bul máseleni sheshý qajettigin Memleket basshysy da atap kórsetken.

«Іshki saýdada ınfraqurylymnyń jetkiliksiz deńgeıde damyp otyrǵandyǵyn atap ótýge bolady. Onyń ishinde saýda jáne qoıma obektileriniń jetispeýshiligi, jalǵa alý qunynyń jáne jyljymaıtyn múlik obektileri men jer baǵasynyń joǵarylyǵy, kommýnıkatsııalar júrgizý qunynyń qymbat bolýyn atap ótken jón», - dedi Nurlan Ábdirov.