EAEO aýmaǵynda jańadan tirkelgen dárilerdiń 300-den astamy — qazaqstandyq ónim

ASTANA. KAZINFORM — Densaýlyq saqtaý mınıstriniń orynbasary Tımýr Muratov Úkimet otyrysynda Eýrazııalyq ekonomıkalyq odaq aýmaǵnyda tirkelgen qazaqstandyq dárilerdiń úlesi artyp jatqanyn málim etti.

— Bıyl dárilik zattardy Eýrazııalyq ekonomıkalyq odaq rásimderi aıasynda tirkeý jumystary belsendi júrgizilip jatyr. Bul tirkelgen dárilerdiń jalpy sanyn 60%-ǵa kóbeıtedi. Olardyń ishinde 300-den astamy — qazaqstandyq dáriler.

Vıtse-mınıstrdiń sózinshe, bul turǵydan Qazaqstan ózge odaqtastarymen ıyq tirestiretindeı deńgeıge jetken.

— Eýrazııalyq ekonomıkalyq odaq elderinde tirkelgen dárilik zattar boıynsha salystyrmaly taldaý nátıjesinde Qazaqstan naryǵy kórsetkishteri ózge elderden kem túspeıdi, bul keń assortımenttiń bar ekendigin kórsetedi, — dedi Tımýr Muratov.

Aıta keteıik, búgin Úkimet halyqty dári-dármekpen qamtamasyz etý jaıyn talqylap jatyr.