EAEO aýmaǵynan kóligin alyp shyqqan sheteldik Kazinform agenttigine alǵysyn bildirdi
AQTÓBE. KAZINFORM – Polshada turatyn Pavel Maevskıı Qazaqstannyń Aqtóbe oblysy aýmaǵynda qalǵan kóligi úshin qaıta oraldy. Kazinform agenttigi oblystyq Polıtsııa departamentimen birge sheteldik azamatqa kómek kórsetti.
Pavel Maevskıı Túrkııa arqyly Aqtóbe qalasyna jetti. Munda Muǵaljar aýdanynyń ortalyǵy Qandyaǵash qalasyna baryp, polıtsııa bóliminiń qyzmetkeri sheteldikti Saǵashıli aýylyna jetkizdi. Sóıtip byltyr jazda qaldyryp ketken kóligin aldy.
- Saǵashıli aýylyndaǵy mehanıkpen arada baılanys ornady. Naýryz aıynda Aqtóbe qalasyna kelip, kólikti alyp ketýdi josparladym. Ózge elge, qalaǵa kelgen kezde qıyndyq týmas úshin Kazinform agenttiginiń tilshisinen kómek suradym, olar kelisip, qol ushyn berdi. Kelisim boıynsha Aqtóbe qalasynyń áýejaıynan kútip alyp, Qandyaǵash qalasyna jolǵa shyqtym. Munda meni polıtsııa qyzmetkeri qarsy alyp, Saǵashıli aýylyna jetkizdi. Mehanıkten kólikti alyp kettim. Kólik júrip turǵanymen, keıbir usaq-túıek bólshekteri bolmady, keıbiri urlanyp ketken eken. Sonymen birge jolda qıyndyqtar da boldy. Búginde bári de artta qalyp, men Polshaǵa jettim. Kólikti kúrdeli jóndeýden ótkizip, keler jyly taǵy da qaıyrymdylyq ekspedıtsııasyna shyǵýdy josparlap otyrmyn. Jolda kezdesken kedergilerge qaramastan Qazaqstan azamattary aqkóńil, qonaqjaı ekenin bildim. Men bul elge qaıta oralatynyma senimdimin ári kómektesken jandarǵa alǵys aıtamyn. Munda sheteldikterge, týrısterge ereshe yqylas kórsetedi,- dedi Pavel Maevskıı.
Onyń aıtýynsha, Kazinform agenttigi kólikti EAEO elderinen alyp shyǵýǵa kómektesti. Endi ol kez kelgen ýaqytta qaıta kele alady ári eshqandaı da keden salyǵyn tólemeıdi. Pavel Maevskıı Qazaqstan terrıtorııasynda kóligin taǵy bir jóndep, Reseıge ótedi. Munda jańa akkýmýlıator salyp, Grýzııa, Túrkııa elderi arqyly Rýmynııaǵa barady. Keıin Polshanyń Krakov qalasyna aıaldap, úıine jetti.
Eske salsaq, ózin Pavel Maevskıı dep tanystyrǵan sheteldik Kazinform redaktsııasynyń elektrondy poshtasyna hat joldady.
Aıtýynsha, naýqas balalardyń emine aqsha jınaý úshin 2025 jyly qaıyrymdylyq marafonyna attanǵan. EAEO terrıtorııasyna Qyrǵyzstan arqyly kirgen sheteldiktiń kóligi Aqtóbe jerindegi Saǵashıli aýyly mańyna kelgende buzylyp qalady. Onda kólikti mehanıkke tapsyryp, qaıta kelýge ýáde etedi. Alaıda mehanıktiń baılanys nómiri qate jazylyp, baılanys úzilgen.
