EAEO alqasynyń tóraǵasy Qazaqstan, Qyrǵyzstan jáne Ózbekstan prezıdentterin Naýryz merekesimen quttyqtady

NUR-SULTAN. QazAqparat – Eýrazııalyq ekonomıkalyq odaq alqasynyń tóraǵasy Mıhaıl Mıasnıkovıch Qazaqstan QR Prezıdenti Qasym-Jomart Toqaevty, Qyrǵyz Respýblıkasynyń basshysy Sadyr Japarovty jáne Ózbekstan Respýblıkasynyń prezıdenti Shavkat Mırzıeevti Halyqaralyq Naýryz merekesimen quttyqtady, dep habarlaıdy QazAqparat EAEO baspasóz qyzmetine silteme jasap.

«Bul ejelgi tamasha kóktem merekesi – Qazaqstan, Qyrǵyzstan jáne Ózbekstan halyqtary mádenıetiniń baı, tarıhı murasynyń mańyzdy, ajyramas bóligi. Tabıǵattyń kóktemgi jańarý kúni elderińizdiń ıgiligi úshin jańa aýqymdy jobalardy júzege asyrýǵa serpin bersin», - delingen quttyqtaý hatynda.

Mıhaıl Mıasnıkovıch memleket basshylaryna myqty densaýlyq pen jaqsylyq, al Qazaqstan, Qyrǵyzstan jáne Ózbekstan halyqtaryna beıbitshilik pen baq-bereke tiledi.

«Naýryz» parsy tilinen aýdarǵanda «Jańa kún» degen maǵynany bildiredi, 21 naýryzda atap ótiledi. Bul ıran jáne túrki halyqtarynyń astronomııalyq kún kúntizbesi boıynsha kóktemniń kelý merekesi. Naýryz – ulttyq dástúr.

2009 jylǵy 30 qyrkúıekte Naýryz ıÝNESKO-nyń Adamzattyń materıaldyq emes mádenı murasynyń reprezentatıvtik tizimine endi. Osy ýaqyttan bastap 21 naýryz Halyqaralyq Naýryz merekesi bolyp jarııalandy.

Sondaı-aq Mıhaıl Mıasnıkovıch Dmıtrıı Mezentsevti Odaqtas memlekettiń memlekettik hatshysy bolyp taǵaıyndalýymen quttyqtady.